[๕๓๐] สาวตฺถี ฯ ตตฺร โข ฯ จตสฺโส อิมา ภิกฺขเว
สุปณฺณโยนิโย ฯ กตมา จตสฺโส ฯ อณฺฑชา สุปณฺณา ชลาพุชา
สุปณฺณา สํเสทชา สุปณฺณา อุปปาติกา สุปณฺณา ฯ อิมา โข
ภิกฺขเว จตสฺโส สุปณฺณโยนิโยติ ฯ

[๕๓๑] สาวตฺถี ฯ จตสฺโส อิมา ภิกฺขเว สุปณฺณโยนิโย ฯ
กตมา จตสฺโส ฯ อณฺฑชา สุปณฺณา ชลาพุชา สุปณฺณา สํเสทชา
สุปณฺณา อุปปาติกา สุปณฺณา ฯ ตตฺร ภิกฺขเว อณฺฑชา สุปณฺณา
อณฺฑเช นาเค หรนฺติ น ชลาพุเช น สํเสทเช น อุปปาติเก ฯ
ตตฺร ภิกฺขเว ชลาพุชา สุปณฺณา อณฺฑเช จ ชลาพุเช จ นาเค
หรนฺติ น สํเสทเช น อุปปาติเก ฯ ตตฺร ภิกฺขเว สํเสทชา
สุปณฺณา อณฺฑเช จ ชลาพุเช จ สํเสทเช จ นาเค หรนฺติ น
อุปปาติเก ฯ ตตฺร ภิกฺขเว อุปปาติกา สุปณฺณา อณฺฑเช จ
ชลาพุเช จ สํเสทเช จ อุปปาติเก จ นาเค หรนฺติ ฯ อิมา โข
ภิกฺขเว จตสฺโส สุปณฺณโยนิโยติ ฯ

[๕๓๒] สาวตฺถี ฯ อญฺญตโร ภิกฺขุ เยน ภควา เตนุปสงฺกมิ
อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ เอกมนฺตํ
นิสินฺโน โข โส ภิกฺขุ ภควนฺตํ เอตทโวจ โก นุ โข ภนฺเต
เหตุ โก ปจฺจโย เยน มิเธกจฺโจ กายสฺส เภทา ปรํ มรณา
อณฺฑชานํ สุปณฺณานํ สหพฺยตํ อุปปชฺชตีติ ฯ อิธ ภิกฺขุ เอกจฺโจ
กาเยน ทฺวยการี โหติ วาจาย ทฺวยการี มนสา ทฺวยการี ตสฺส
สุตํ โหติ อณฺฑชา สุปณฺณา ทีฆายุกา วณฺณวนฺโต
สุขพหุลาติ ฯ ตสฺส เอวํ โหติ อโห วตาหํ กายสฺส เภทา ปรํ
มรณา อณฺฑชานํ สุปณฺณานํ สหพฺยตํ อุปปชฺเชยฺยนฺติ ฯ โส
กายสฺส เภทา ปรํ มรณา อณฺฑชานํ สุปณฺณานํ สหพฺยตํ อุปปชฺชติ ฯ
อยํ โข ภิกฺขุ เหตุ อยํ ปจฺจโย เยน มิเธกจฺโจ กายสฺส
เภทา ปรํ มรณา อณฺฑชานํ สุปณฺณานํ สหพฺยตํ อุปปชฺชตีติ ฯ

[๕๓๓] สาวตฺถี ฯ เอกมนฺตํ นิสินฺโน โข โส ภิกฺขุ ภควนฺตํ
เอตทโวจ โก นุ โข ภนฺเต เหตุ โก ปจฺจโย เยน มิเธกจฺโจ
กายสฺส เภทา ปรํ มรณา ชลาพุชานํ สุปณฺณานํ ฯเปฯ สํเสทชานํ
สุปณฺณานํ ฯ อุปปาติกานํ สุปณฺณานํ สหพฺยตํ อุปปชฺชตีติ ฯ
อิธ ภิกฺขุ เอกจฺโจ กาเยน ทฺวยการี โหติ วาจาย ทฺวยการี มนสา
ทฺวยการี ตสฺส สุตํ โหติ อุปปาติกา สุปณฺณา ทีฆายุกา
วณฺณวนฺโต สุขพหุลาติ ฯ ตสฺส เอวํ โหติ อโห วตาหํ
กายสฺส เภทา ปรํ มรณา อุปปาติกานํ สุปณฺณานํ สหพฺยตํ
อุปปชฺเชยฺยนฺติ ฯ โส กายสฺส เภทา ปรํ มรณา อุปปาติกานํ
สุปณฺณานํ สหพฺยตํ อุปปชฺชติ ฯ อยํ โข ภิกฺขุ เหตุ อยํ
ปจฺจโย เยน มิเธกจฺโจ กายสฺส เภทา ปรํ มรณา อุปปาติกานํ
สุปณฺณานํ สหพฺยตํ อุปปชฺชตีติ ฯ

[๕๓๔] สาวตฺถี ฯ เอกมนฺตํ นิสินฺโน โข โส ภิกฺขุ ภควนฺตํ
เอตทโวจ โก นุ โข ภนฺเต เหตุ โก ปจฺจโย เยน มิเธกจฺโจ
กายสฺส เภทา ปรํ มรณา อณฺฑชานํ สุปณฺณานํ สหพฺยตํ
อุปปชฺชตีติ ฯ อิธ ภิกฺขุ เอกจฺโจ กาเยน ทฺวยการี โหติ วาจาย
ทฺวยการี มนสา ทฺวยการี ตสฺส สุตํ โหติ อณฺฑชา สุปณฺณา
ทีฆายุกา วณฺณวนฺโต สุขพหุลาติ ฯ ตสฺส เอวํ โหติ อโห
วตาหํ กายสฺส เภทา ปรํ มรณา อณฺฑชานํ สุปณฺณานํ สหพฺยตํ
อุปปชฺเชยฺยนฺติ ฯ โส อนฺนํ เทติ ปานํ เทติ วตฺถํ เทติ ยานํ
เทติ มาลํ เทติ คนฺธํ เทติ วิเลปนํ เทติ เสยฺยํ เทติ อาวสถํ
เทติ ปทีเปยฺยํ เทติ ฯ โส กายสฺส เภทา ปรํ มรณา อณฺฑชานํ
สุปณฺณานํ สหพฺยตํ อุปปชฺชติ ฯ อยํ โข ภิกฺขุ เหตุ อยํ
ปจฺจโย เยน มิเธกจฺโจ กายสฺส เภทา ปรํ มรณา อณฺฑชานํ
สุปณฺณานํ สหพฺยตํ อุปปชฺชติ ฯ

[๕๓๕] สาวตฺถี ฯ เอกมนฺตํ นิสินฺโน โข โส ภิกฺขุ ภควนฺตํ
เอตทโวจ โก นุ โข ภนฺเต เหตุ โก ปจฺจโย เยน มิเธกจฺโจ
กายสฺส เภทา ปรํ มรณา ชลาพุชานํ สุปณฺณานํ ฯเปฯ สํเสทชานํ
สุปณฺณานํ ฯ อุปปาติกานํ สุปณฺณานํ สหพฺยตํ อุปปชฺชตีติ ฯ
อิธ ภิกฺขุ เอกจฺโจ กาเยน ทฺวยการี โหติ วาจาย ทฺวยการี มนสา
ทฺวยการี ตสฺส สุตํ โหติ อุปปาติกา สุปณฺณา ทีฆายุกา
วณฺณวนฺโต สุขพหุลาติ ฯ ตสฺส เอวํ โหติ อโห วตาหํ กายสฺส
เภทา ปรํ มรณา อุปปาติกานํ สุปณฺณานํ สหพฺยตํ อุปปชฺเชยฺยนฺติ ฯ
โส อนฺนํ เทติ ปานํ เทติ วตฺถํ เทติ ยานํ เทติ มาลํ เทติ
คนฺธํ เทติ วิเลปนํ เทติ เสยฺยํ เทติ อาวสถํ เทติ ปทีเปยฺยํ
เทติ ฯ โส กายสฺส เภทา ปรํ มรณา อุปปาติกานํ สุปณฺณานํ
สหพฺยตํ อุปปชฺชติ ฯ อยํ โข ภิกฺขุ เหตุ อยํ ปจฺจโย เยน
มิเธกจฺโจ กายสฺส เภทา ปรํ มรณา อุปปาติกานํ สุปณฺณานํ
สหพฺยตํ อุปปชฺชตีติ ฯ (เอวํ ๑ ปิณฺฑิเกน ฉจตฺตาฬีสํ สุตฺตนฺตา
โหนฺติ) ฯ
สุปณฺณสํยุตฺตํ นิฏฺฐิตํ ฯ
ตสฺสุทฺทานํ
สุทฺธกํ หรติ ๒ เจว ทฺวยการี จตุโรปิ ๓ จญ
ทานูปการา จตฺตาโร ๔ สุปณฺเณหิ ๕ สุปฺปกาสิตาติ ฯ
______________
#๑ ยุ. ปิณฺฑเกน ฉ จตฺตาฬีส ฯ ๒ โป. วิหรนฺติ ฯ ยุ. หรนฺติ ฯ ๓ ยุ. จตุโร จ ฯ
#๔ ยุ. ทานุปการ จ จตฺตาโร ฯ ๕ ม. สุปณฺเณ ฯ ยุ. สุปณฺณา ฯ
คนฺธพฺพกายสํยุตฺตํ

[๕๓๖] เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม ฯเปฯ ภควา เอตทโวจ คนฺธพฺพกายิเก [๑]
เทเว โว ภิกฺขเว เทสิสฺสามิ ตํ สุณาถ ฯเปฯ กตเม จ ภิกฺขเว
คนฺธพฺพกายิกา เทวา ฯ สนฺติ ภิกฺขเว มูลคนฺเธ อธิวตฺถา เทวา
สนฺติ ภิกฺขเว สารคนฺเธ อธิวตฺถา เทวา สนฺติ ภิกฺขเว เผคฺคุคนฺเธ
อธิวตฺถา เทวา สนฺติ ภิกฺขเว ตจคนฺเธ อธิวตฺถา เทวา
สนฺติ ภิกฺขเว ปปฏิกคนฺเธ อธิวตฺถา เทวา สนฺติ ภิกฺขเว
ปตฺตคนฺเธ อธิวตฺถา เทวา สนฺติ ภิกฺขเว ปุปฺผคนฺเธ อธิวตฺถา
เทวา สนฺติ ภิกฺขเว ผลคนฺเธ อธิวตฺถา เทวา สนฺติ ภิกฺขเว
รสคนฺเธ อธิวตฺถา เทวา สนฺติ ภิกฺขเว คนฺธคนฺเธ อธิวตฺถา
เทวา ฯ อิเม วุจฺจนฺติ ภิกฺขเว คนฺธพฺพกายิกา เทวาติ ฯ

[๕๓๗] สาวตฺถี ฯ อถ โข อญฺญตโร ภิกฺขุ เยน ภควา ฯเปฯ
เอกมนฺตํ นิสินฺโน โข โส ภิกฺขุ ภควนฺตํ เอตทโวจ โก นุ โข
ภนฺเต เหตุ โก ปจฺจโย เยน มิเธกจฺโจ กายสฺส เภทา ปรํ
มรณา คนฺธพฺพกายิกานํ เทวานํ สหพฺยตํ อุปปชฺชตีติ ฯ อิธ ภิกฺขุ
เอกจฺโจ กาเยน สุจริตํ จรติ วาจาย สุจริตํ จรติ มนสา สุจริตํ
จรติ ตสฺส สุตํ โหติ คนฺธพฺพกายิกา เทวา ทีฆายุกา
วณฺณวนฺโต สุขพหุลาติ ฯ ตสฺส เอวํ โหติ อโห วตาหํ กายสฺส
#๑ ยุ. โวติ ทิสฺสติ ฯ ม. โข ฯ
เภทา ปรํ มรณา คนฺธพฺพกายิกานํ เทวานํ สหพฺยตํ อุปปชฺเชยฺยนฺติ ฯ
โส กายสฺส เภทา ปรํ มรณา คนฺธพฺพกายิกานํ เทวานํ สหพฺยตํ
อุปปชฺชติ ฯ อยํ โข ภิกฺขุ เหตุ อยํ ปจฺจโย เยน มิเธกจฺโจ
กายสฺส เภทา ปรํ มรณา คนฺธพฺพกายิกานํ เทวานํ สหพฺยตํ
อุปปชฺชตีติ ฯ

[๕๓๘] สาวตฺถี ฯ อถ โข อญฺญตโร ภิกฺขุ เยน ภควา
เตนุปสงฺกมิ อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ
เอกมนฺตํ นิสินฺโน โข โส ภิกฺขุ ภควนฺตํ เอตทโวจ โก นุ
โข ภนฺเต เหตุ โก ปจฺจโย เยน มิเธกจฺโจ กายสฺส เภทา
ปรํ มรณา มูลคนฺเธ อธิวตฺถานํ เทวานํ สหพฺยตํ อุปปชฺชตีติ ฯ
อิธ ภิกฺขุ เอกจฺโจ กาเยน สุจริตํ จรติ วาจาย สุจริตํ จรติ
มนสา สุจริตํ จรติ ตสฺส สุตํ โหติ มูลคนฺเธ อธิวตฺถา เทวา
ทีฆายุกา วณฺณวนฺโต สุขพหุลาติ ฯ ตสฺส เอวํ โหติ อโห
วตาหํ กายสฺส เภทา ปรํ มรณา มูลคนฺเธ อธิวตฺถานํ เทวานํ
สหพฺยตํ อุปปชฺเชยฺยนฺติ ฯ โส ทาตา โหติ มูลคนฺธานํ ฯ โส
กายสฺส เภทา ปรํ มรณา มูลคนฺเธ อธิวตฺถานํ เทวานํ สหพฺยตํ
อุปปชฺชติ ฯ อยํ โข ภิกฺขุ เหตุ อยํ ปจฺจโย เยน มิเธกจฺโจ
กายสฺส เภทา ปรํ มรณา มูลคนฺเธ อธิวตฺถานํ เทวานํ สหพฺยตํ
อุปปชฺชตีติ ฯ

[๕๓๙] สาวตฺถี ฯ เอกมนฺตํ นิสินฺโน โข โส ภิกฺขุ ภควนฺตํ
เอตทโวจ โก นุ โข ภนฺเต เหตุ โก ปจฺจโย เยน มิเธกจฺโจ
กายสฺส เภทา ปรํ มรณา สารคนฺเธ อธิวตฺถานํ เทวานํ ฯเปฯ
เผคฺคุคนฺเธ อธิวตฺถานํ เทวานํ ฯ ตจคนฺเธ อธิวตฺถานํ เทวานํ ฯ
ปปฏิกคนฺเธ อธิวตฺถานํ เทวานํ ฯ ปตฺตคนฺเธ อธิวตฺถานํ เทวานํ ฯ
ปุปฺผคนฺเธ อธิวตฺถานํ เทวานํ ฯ ผลคนฺเธ อธิวตฺถานํ เทวานํ ฯ
รสคนฺเธ อธิวตฺถานํ เทวานํ ฯ คนฺธคนฺเธ อธิวตฺถานํ เทวานํ
สหพฺยตํ อุปปชฺชตีติ ฯ อิธ ภิกฺขุ เอกจฺโจ กาเยน สุจริตํ จรติ
วาจาย สุจริตํ จรติ มนสา สุจริตํ จรติ ตสฺส สุตํ โหติ
สารคนฺเธ อธิวตฺถา เทวา ทีฆายุกา วณฺณวนฺโต สุขพหุลาติ ฯ
ตสฺส เอวํ โหติ อโห วตาหํ กายสฺส เภทา ปรํ มรณา
สารคนฺเธ อธิวตฺถานํ เทวานํ ฯ เผคฺคุคนฺเธ อธิวตฺถานํ เทวานํ ฯ
ตจคนฺเธ อธิวตฺถานํ เทวานํ ฯ ปปฏิกคนฺเธ อธิวตฺถานํ เทวานํ ฯ
ปตฺตคนฺเธ อธิวตฺถานํ เทวานํ ฯ ปุปฺผคนฺเธ อธิวตฺถานํ เทวานํ ฯ
ผลคนฺเธ อธิวตฺถานํ เทวานํ ฯ รสคนฺเธ อธิวตฺถานํ เทวานํ ฯ
คนฺธคนฺเธ อธิวตฺถานํ เทวานํ สหพฺยตํ อุปปชฺเชยฺยนฺติ ฯ โส
ทาตา โหติ สารคนฺธานํ ฯ โส ทาตา โหติ เผคฺคุคนฺธานํ ฯ โส
ทาตา โหติ ตจคนฺธานํ ฯ โส ทาตา โหติ ปปฏิกคนฺธานํ ฯ โส
ทาตา โหติ ปตฺตคนฺธานํ ฯ โส ทาตา โหติ ปุปฺผคนฺธานํ ฯ โส
ทาตา โหติ ผลคนฺธานํ ฯ โส ทาตา โหติ รสคนฺธานํ ฯ โส
ทาตา โหติ คนฺธคนฺธานํ ฯ โส กายสฺส เภทา ปรํ มรณา
คนฺธคนฺเธ อธิวตฺถานํ เทวานํ สหพฺยตํ อุปปชฺชติ ฯ อยํ โข
ภิกฺขุ เหตุ อยํ ปจฺจโย เยน มิเธกจฺโจ กายสฺส เภทา ปรํ
มรณา คนฺธคนฺเธ อธิวตฺถานํ เทวานํ สหพฺยตํ อุปปชฺชตีติ ฯ