[ข้อ ๕๐๑ นี้ในภาษาบาลีไม่มี ทำให้ข้อตั้งแต่ ๕๐๒ – ๖๑๒
เมื่อเทียบกับในภาษาบาลี จึงผิดกันอยู่หนึ่งข้อ ตัวอย่างเช่น ภาษาไทย ข้อ
๕๐๒ ภาษาบาลีไทยจะเป็นข้อ ๕๐๑ จนถึงข้อสุดท้าย ภาษาไทยข้อ ๖๑๒
ภาษาบาลีไทยจะเป็นข้อ ๖๑๑]

[๕๐๑] สาวตฺถี ฯ โย ภิกฺขเว จกฺขุสมฺผสฺสสฺมึ ฉนฺทราโค
จิตฺตสฺเสโส อุปกฺกิเลโส โย โสตสมฺผสฺสสฺมึ ฯ โย ฆานสมฺผสฺสสฺมึ ฯ
โย ชิวฺหาสมฺผสฺสสฺมึ ฯ โย กายสมฺผสฺสสฺมึ ฯ
โย มโนสมฺผสฺสสฺมึ ฉนฺทราโค จิตฺตสฺเสโส อุปกฺกิเลโส ฯ ยโต
โข ภิกฺขเว ภิกฺขุโน ฯเปฯ อภิญฺญา สจฺฉิกรณีเยสุ ธมฺเมสูติ ฯ

[๕๐๒] สาวตฺถี ฯ โย ภิกฺขเว จกฺขุสมฺผสฺสชาย เวทนาย ฉนฺทราโค
จิตฺตสฺเสโส อุปกฺกิเลโส โย โสตสมฺผสฺสชาย เวทนาย ฯ
โย ฆานสมฺผสฺสชาย เวทนาย ฯ โย ชิวฺหาสมฺผสฺสชาย เวทนาย ฯ
โย กายสมฺผสฺสชาย เวทนาย ฯ โย มโนสมฺผสฺสชาย เวทนาย ฉนฺทราโค
จิตฺตสฺเสโส อุปกฺกิเลโส ฯ ยโต โข ภิกฺขเว ภิกฺขุโน ฯเปฯ
อภิญฺญา สจฺฉิกรณีเยสุ ธมฺเมสูติ ฯ

[๕๐๓] สาวตฺถี ฯ โย ภิกฺขเว รูปสญฺญาย ฉนฺทราโค
จิตฺตสฺเสโส อุปกฺกิเลโส โย สทฺทสญฺญาย ฯ โย คนฺธสญฺญาย ฯ
โย รสสญฺญาย ฯ โย โผฏฺฐพฺพสญฺญาย ฯ โย ธมฺมสญฺญาย
ฉนฺทราโค จิตฺตสฺเสโส อุปกฺกิเลโส ฯ ยโต โข ภิกฺขเว
ภิกฺขุโน ฯเปฯ อภิญฺญา สจฺฉิกรณีเยสุ ธมฺเมสูติ ฯ

[๕๐๔] สาวตฺถี ฯ โย ภิกฺขเว รูปสญฺเจตนาย ฉนฺทราโค
จิตฺตสฺเสโส อุปกฺกิเลโส โย สทฺทสญฺเจตนาย ฯ โย คนฺธสญฺเจตนาย ฯ
โย รสสญฺเจตนาย ฯ โย โผฏฺฐพฺพสญฺเจตนาย ฯ
โย ธมฺมสญฺเจตนาย ฉนฺทราโค จิตฺตสฺเสโส อุปกฺกิเลโส ฯ ยโต
โข ภิกฺขเว ภิกฺขุโน ฯเปฯ อภิญฺญา สจฺฉิกรณีเยสุ ธมฺเมสูติ ฯ

[๕๐๕] สาวตฺถี ฯ โย ภิกฺขเว รูปตณฺหาย ฉนฺทราโค
จิตฺตสฺเสโส อุปกฺกิเลโส โย สทฺทตณฺหาย ฯ โย คนฺธตณฺหาย ฯ
โย รสตณฺหาย ฯ โย โผฏฺฐพฺพตณฺหาย ฯ โย ธมฺมตณฺหาย
ฉนฺทราโค จิตฺตสฺเสโส อุปกฺกิเลโส ฯ ยโต โข ภิกฺขเว
ภิกฺขุโน ฯเปฯ อภิญฺญา สจฺฉิกรณีเยสุ ธมฺเมสูติ ฯ

[๕๐๖] สาวตฺถี ฯ โย ภิกฺขเว ปฐวีธาตุยา ฉนฺทราโค
จิตฺตสฺเสโส อุปกฺกิเลโส โย อาโปธาตุยา ฯ โย เตโชธาตุยา ฯ โย
วาโยธาตุยา ฯ โย อากาสธาตุยา ฯ โย วิญฺญาณธาตุยา ฉนฺทราโค
จิตฺตสฺเสโส อุปกฺกิเลโส ฯ ยโต โข ภิกฺขเว ภิกฺขุโน อิเมสุ ฉสุ
ฐาเนสุ เจตโส อุปกฺกิเลโส ปหีโน โหติ เนกฺขมฺมนินฺนํ จสฺส
จิตฺตํ โหติ เนกฺขมฺมปริภาวิตํ จิตฺตํ กมฺมนิยํ ขายติ อภิญฺญา
สจฺฉิกรณีเยสุ ธมฺเมสูติ ฯ

[๕๐๗] สาวตฺถี ฯ โย ภิกฺขเว รูปสฺมึ ฉนฺทราโค จิตฺตสฺเสโส
อุปกฺกิเลโส ฯเปฯ โย วิญฺญาณสฺมึ ฉนฺทราโค จิตฺตสฺเสโส
อุปกฺกิเลโส ฯ ยโต โข ภิกฺขเว ภิกฺขุโน อิเมสุ ฉสุ ฐาเนสุ
เจตโส อุปกฺกิเลโส ปหีโน โหติ เนกฺขมฺมนินฺนํ จสฺส จิตฺตํ
โหติ เนกฺขมฺมปริภาวิตํ จิตฺตํ กมฺมนิยํ ขายติ อภิญฺญา
สจฺฉิกรณีเยสุ ธมฺเมสูติ ฯ
กิเลสสํยุตฺตํ ฯ
ตสฺสุทฺทานํ
จกฺขุ รูปญฺจ วิญฺญาณํ ผสฺโส จ เวทนาย จ
สญฺญา จ เจตนา ตณฺหา ธาตุ ขนฺเธน เต ทสาติ ฯ
_____________
สารีปุตฺตสํยุตฺตํ

[๕๐๘] เอกํ สมยํ อายสฺมา สารีปุตฺโต สาวตฺถิยํ วิหรติ
เชตวเน อนาถปิณฺฑิกสฺส อาราเม ฯ อถ โข อายสฺมา สารีปุตฺโต
ปุพฺพณฺหสมยํ นิวาเสตฺวา ปตฺตจีวรมาทาย สาวตฺถึ ๑ ปิณฺฑาย ปาวิสิ
สาวตฺถิยํ ปิณฺฑาย จริตฺวา ปจฺฉาภตฺตํ ปิณฺฑปาตปฏิกฺกนฺโต เยน
อนฺธวนํ เตนุปสงฺกมิ ทิวาวิหาราย อนฺธวนํ อชฺโฌคาเหตฺวา
อญฺญตรสฺมึ รุกฺขมูเล ทิวาวิหารํ ๒ นิสีทิ ฯ อถ โข อายสฺมา
สารีปุตฺโต สายณฺหสมยํ ปฏิสลฺลานา วุฏฺฐิโต เยน เชตวนํ อนาถปิณฺฑิกสฺส
อาราโม เตนุปสงฺกมิ ฯ อทฺทสา โข อายสฺมา อานนฺโท
อายสฺมนฺตํ สารีปุตฺตํ ทูรโตว อาคจฺฉนฺตํ ทิสฺวาน อายสฺมนฺตํ
สารีปุตฺตํ เอตทโวจ วิปฺปสนฺนานิ โข เต อาวุโส สารีปุตฺต
อินฺทฺริยานิ ปริสุทฺโธ มุขวณฺโณ ปริโยทาโต กตเมนายสฺมา
สารีปุตฺโต อชฺช วิหาเรน วิหาสีติ ฯ อิธาหํ อาวุโส วิวิจฺเจว
กาเมหิ วิวิจฺจ อกุสเลหิ ธมฺเมหิ สวิตกฺกํ สวิจารํ วิเวกชํ ปีติสุขํ
ปฐมํ ฌานํ อุปสมฺปชฺช วิหรามิ ฯ ตสฺส มยฺหํ อาวุโส น
เอวํ โหติ อหํ ปฐมํ ฌานํ สมาปชฺชามีติ วา อหํ ปฐมํ
ฌานํ สมาปนฺโนติ วา อหํ ปฐมา ฌานา วุฏฺฐิโตติ วาติ ฯ
ตถา หิ ปนายสฺมโต สารีปุตฺตสฺส ทีฆรตฺตํ อหงฺการมมงฺการมานานุสยา
สุสมูหตา ตสฺมา อายสฺมโต สารีปุตฺตสฺส น เอวํ โหติ
#๑ โป. สาวตฺถิยํ ฯ ๒ โป. ทิวาวิหารตฺถาย ฯ
อหํ ปฐมํ ฌานํ สมาปชฺชามีติ วา อหํ ปฐมํ ฌานํ สมาปนฺโนติ
วา อหํ ปฐมา ฌานา วุฏฺฐิโตติ วาติ ฯ

[๕๐๙] สาวตฺถี ฯ อทฺทสา โข อายสฺมา อานนฺโท ฯเปฯ
อายสฺมนฺตํ สารีปุตฺตํ เอตทโวจ วิปฺปสนฺนานิ โข เต อาวุโส
สารีปุตฺต อินฺทฺริยานิ ปริสุทฺโธ มุขวณฺโณ ปริโยทาโต
กตเมนายสฺมา สารีปุตฺโต อชฺช วิหาเรน วิหาสีติ ฯ อิธาหํ อาวุโส
วิตกฺกวิจารานํ วูปสมา อชฺฌตฺตํ สมฺปสาทนํ เจตโส เอโกทิภาวํ
อวิตกฺกํ อวิจารํ สมาธิชํ ปีติสุขํ ทุติยํ ฌานํ อุปสมฺปชฺช วิหรามิ ฯ
ตสฺส มยฺหํ อาวุโส น เอวํ โหติ อหํ ทุติยํ ฌานํ สมาปชฺชามีติ
วา อหํ ทุติยํ ฌานํ สมาปนฺโนติ วา อหํ ทุติยา ๑ ฌานา
วุฏฺฐิโตติ วาติ ฯ ตถา หิ ปนายสฺมโต สารีปุตฺตสฺส ทีฆรตฺตํ
อหงฺการมมงฺการมานานุสยา สุสมูหตา ตสฺมา อายสฺมโต สารีปุตฺตสฺส
น เอวํ โหติ อหํ ทุติยํ ฌานํ สมาปชฺชามีติ วา อหํ
ทุติยํ ฌานํ สมาปนฺโนติ วา อหํ ทุติยา ฌานา วุฏฺฐิโตติ วาติ ฯ