[๔๗๑] สาวตฺถี ฯ จกฺขุวิญฺญาณํ ภิกฺขเว อนิจฺจํ วิปริณามิ
อญฺญถาภาวิ โสตวิญฺญาณํ ฯเปฯ ฆานวิญฺญาณํ ฯ ชิวฺหาวิญฺญาณํ ฯ
กายวิญฺญาณํ ฯ มโนวิญฺญาณํ อนิจฺจํ วิปริณามิ
อญฺญถาภาวิ ฯ โย ภิกฺขเว ฯเปฯ สจฺฉิกโรติ ฯ ยสฺส โข ภิกฺขเว
ฯเปฯ สจฺฉิกโรติ ฯ โย ภิกฺขเว ฯเปฯ สมฺโพธิปรายโนติ ฯ

[๔๗๒] สาวตฺถี ฯ จกฺขุสมฺผสฺโส ภิกฺขเว อนิจฺโจ วิปริณามี
#๑ ม. ปชานาติ ฯ
อญฺญถาภาวี โสตสมฺผสฺโส ฯ ฆานสมฺผสฺโส ฯ ชิวฺหาสมฺผสฺโส ฯ
กายสมฺผสฺโส ฯ มโนสมฺผสฺโส อนิจฺโจ วิปริณามี อญฺญถาภาวี ฯ
โย ภิกฺขเว อิเม ธมฺเม เอวํ สทฺทหติ อธิมุจฺจติ ฯ อยํ วุจฺจติ
สทฺธานุสารี ฯเปฯ สมฺโพธิปรายโนติ ฯ

[๔๗๓] สาวตฺถี ฯ จกฺขุสมฺผสฺสชา ภิกฺขเว เวทนา อนิจฺจา
วิปริณามี อญฺญถาภาวี โสตสมฺผสฺสชา เวทนา ฯ ฆานสมฺผสฺสชา
เวทนา ฯ ชิวฺหาสมฺผสฺสชา เวทนา ฯ กายสมฺผสฺสชา เวทนา ฯ
มโนสมฺผสฺสชา เวทนา อนิจฺจา วิปริณามี อญฺญถาภาวี ฯ โยพ
ภิกฺขเว อิเม ธมฺเม เอวํ สทฺทหติ อธิมุจฺจติ ฯ อยํ วุจฺจติ
สทฺธานุสารี ฯเปฯ สมฺโพธิปรายโนติ ฯ

[๔๗๔] สาวตฺถี ฯ รูปสญฺญา ภิกฺขเว อนิจฺจา วิปริณามี
อญฺญถาภาวี สทฺทสญฺญา ฯ คนฺธสญฺญา ฯ รสสญฺญา ฯ
โผฏฺฐพฺพสญฺญา ฯ ธมฺมสญฺญา อนิจฺจา วิปริณามี อญฺญถาภาวี ฯ
โย ภิกฺขเว อิเม ธมฺเม เอวํ สทฺทหติ อธิมุจฺจติ ฯ อยํ
วุจฺจติ สทฺธานุสารี ฯเปฯ สมฺโพธิปรายโนติ ฯ

[๔๗๕] สาวตฺถี ฯ รูปสญฺเจตนา ภิกฺขเว อนิจฺจา วิปริณามี
อญฺญถาภาวี สทฺทสญฺเจตนา ฯ คนฺธสญฺเจตนา ฯ รสสญฺเจตนา ฯ
โผฏฺฐพฺพสญฺเจตนา ฯ ธมฺมสญฺเจตนา อนิจฺจา วิปริณามี อญฺญถาภาวี ฯ
โย ภิกฺขเว อิเม ธมฺเม เอวํ สทฺทหติ อธิมุจฺจติ ฯ อยํ
วุจฺจติ สทฺธานุสารี ฯเปฯ สมฺโพธิปรายโนติ ฯ

[๔๗๖] สาวตฺถี ฯ รูปตณฺหา ภิกฺขเว อนิจฺจา วิปริณามี
อญฺญถาภาวี สทฺทตณฺหา ฯ คนฺธตณฺหา ฯ รสตณฺหา ฯ
โผฏฺฐพฺพตณฺหา ฯ ธมฺมตณฺหา อนิจฺจา วิปริณามี อญฺญถาภาวี ฯ
โย ภิกฺขเว อิเม ธมฺเม เอวํ สทฺทหติ อธิมุจฺจติ ฯ อยํ วุจฺจติ
สทฺธานุสารี ฯเปฯ สมฺโพธิปรายโนติ ฯ

[๔๗๗] สาวตฺถี ฯ ปฐวีธาตุ ภิกฺขเว อนิจฺจา วิปริณามี
อญฺญถาภาวี ฯ อาโปธาตุ ฯ เตโชธาตุ ฯ วาโยธาตุ ฯ
อากาสธาตุ ฯ วิญฺญาณธาตุ อนิจฺจา วิปริณามี อญฺญถาภาวี ฯ
โย ภิกฺขเว อิเม ธมฺเม เอวํ สทฺทหติ อธิมุจฺจติ ฯ อยํ วุจฺจติ
สทฺธานุสารี ฯเปฯ สมฺโพธิปรายโนติ ฯ

[๔๗๘] สาวตฺถี ฯ รูปํ ภิกฺขเว อนิจฺจํ วิปริณามิ อญฺญถาภาวิ
เวทนา อนิจฺจา วิปริณามี อญฺญถาภาวี สญฺญา ฯ สงฺขารา
อนิจฺจา วิปริณามิโน อญฺญถาภาวิโน วิญฺญาณํ อนิจฺจํ วิปริณามิ
อญฺญถาภาวิ ฯ โย ภิกฺขเว อิเม ธมฺเม เอวํ สทฺทหติ อธิมุจฺจติ ฯ
อยํ วุจฺจติ สทฺธานุสารี โอกฺกนฺโต สมฺมตฺตนิยามํ สปฺปุริสภูมึ
โอกฺกนฺโต วีติวตฺโต ปุถุชฺชนภูมึ อภพฺโพ ตํ กมฺมํ กาตุํ ยํ
กมฺมํ กตฺวา นิรยํ วา ติรจฺฉานโยนึ วา ปิตฺติวิสยํ วา อุปปชฺเชยฺย
อภพฺโพว ตาว กาลํ กาตุํ ยาว น โสตาปตฺติผลํ สจฺฉิกโรติ ฯ
ยสฺส โข ภิกฺขเว อิเม ธมฺมา เอวํ ปญฺญาย มตฺตโส นิชฺฌานํ
ขมนฺติ ฯ อยํ วุจฺจติ ธมฺมานุสารี โอกฺกนฺโต สมฺมตฺตนิยามํ สปฺปุริส-
ภูมึ โอกฺกนฺโต วีติวตฺโต ปุถุชฺชนภูมึ อภพฺโพ ตํ กมฺมํ กาตุํ ยํ
กมฺมํ กตฺวา นิรยํ วา ติรจฺฉานโยนึ วา ปิตฺติวิสยํ วา อุปปชฺเชยฺย
อภพฺโพว ตาว กาลํ กาตุํ ยาว น โสตาปตฺติผลํ สจฺฉิกโรติ ฯ
โย ภิกฺขเว อิเม ธมฺเม เอวํ ปชานาติ เอวํ ปสฺสติ ฯ อยํ วุจฺจติ
โสตาปนฺโน อวินิปาตธมฺโม นิยโต สมฺโพธิปรายโนติ ฯ
โอกฺกนฺตสํยุตฺตํ ฯ
ตสฺสุทฺทานํ
จกฺขุ รูปญฺจ วิญฺญาณํ ผสฺโส จ เวทนาย จ
สญฺญา จ เจตนา ตณฺหา ธาตุ ขนฺเธน เต ทสาติ ฯ
_____________
อุปฺปาทสํยุตฺตํ

[๔๗๙] สาวตฺถี ฯ โย ๑ ภิกฺขเว จกฺขุสฺส อุปฺปาโท ฐิติ
อภินิพฺพตฺติ ปาตุภาโว ทุกฺขสฺเสโส อุปฺปาโท โรคานํ ฐิติ
ชรามรณสฺส ปาตุภาโว โย โสตสฺส อุปฺปาโท ฐิติ ฯเปฯ โย
ฆานสฺส อุปฺปาโท ฐิติ ฯ โย ชิวฺหาย อุปฺปาโท ฐิติ ฯ โย
กายสฺส อุปฺปาโท ฐิติ ฯ โย มนสฺส อุปฺปาโท ฐิติ อภินิพฺพตฺติ
ปาตุภาโว ทุกฺขสฺเสโส อุปฺปาโท โรคานํ ฐิติ ชรามรณสฺส
ปาตุภาโว ฯ

[๔๘๐] โย จ ๒ ภิกฺขเว จกฺขุสฺส นิโรโธ วูปสโม อตฺถงฺคโม
ทุกฺขสฺเสโส นิโรโธ โรคานํ วูปสโม ชรามรณสฺส อตฺถงฺคโม ฯ
โย โสตสฺส นิโรโธ ฯเปฯ โย ฆานสฺส นิโรโธ ฯ โย ชิวฺหาย
นิโรโธ ฯ โย กายสฺส นิโรโธ ฯ โย มนสฺส นิโรโธ วูปสโม
อตฺถงฺคโม ทุกฺขสฺเสโส นิโรโธ โรคานํ วูปสโม ชรามรณสฺส
อตฺถงฺคโมติ ฯ