[๔๕๑] สาวตฺถี ฯ กิสฺมึ นุ โข ภิกฺขเว สติ กึ อุปาทาย
กึ อภินิวิสฺส เอวํ ทิฏฺฐิ อุปฺปชฺชติ อรูปี อตฺตา โหติ อโรโค
ปรมฺมรณาติ (เปยฺยาโล) ฯ

[๔๕๒] สาวตฺถี ฯ รูปี จ อรูปี จ อตฺตา โหติ อโรโค
ปรมฺมรณาติ ฯ

[๔๕๓] เนว รูปี นารูปี อตฺตา โหติ อโรโค ปรมฺมรณาติ ฯ

[๔๕๔] เอกนฺตสุขี อตฺตา โหติ อโรโค ปรมฺมรณาติ ฯ

[๔๕๕] เอกนฺตทุกฺขี อตฺตา โหติ อโรโค ปรมฺมรณาติ ฯ

[๔๕๖] สุขทุกฺขี อตฺตา โหติ อโรโค ปรมฺมรณาติ ฯ

[๔๕๗] อทุกฺขมสุขี อตฺตา โหติ อโรโค ปรมฺมรณาติ ฯ ภควํมูลกา
โน ภนฺเต ธมฺมา ฯเปฯ รูเป โข ภิกฺขเว สติ รูปํ
อุปาทาย รูปํ อภินิวิสฺส เอวํ ทิฏฺฐิ อุปฺปชฺชติ อทุกฺขมสุขี
อตฺตา โหติ อโรโค ปรมฺมรณาติ ฯ เวทนาย สติ ฯเปฯ
สญฺญาย สติ ฯ สงฺขาเรสุ สติ ฯ วิญฺญาเณ สติ วิญฺญาณํ
อุปาทาย วิญฺญาณํ อภินิวิสฺส เอวํ ทิฏฺฐิ อุปฺปชฺชติ อทุกฺขมสุขี
อตฺตา โหติ อโรโค ปรมฺมรณาติ ฯ

[๔๕๘] ตํ กึ มญฺญถ ภิกฺขเว รูปํ นิจฺจํ วา อนิจฺจํ วาติ ฯ
อนิจฺจํ ภนฺเต ฯเปฯ วิปริณามธมฺมํ อปิ นุ ตํ อนุปาทาย
เอวํ ทิฏฺฐิ อุปฺปชฺเชยฺย อทุกฺขมสุขี อตฺตา โหติ อโรโค ปรมมรณาติ ฯ
โน เหตํ ภนฺเต ฯ อิติ โข ภิกฺขเว ทุกฺเข สติ
ทุกฺขํ อุปาทาย ทุกฺขํ อภินิวิสฺส เอวํ ทิฏฺฐิ อุปฺปชฺชติ อทุกฺขมสุขี
อตฺตา โหติ อโรโค ปรมฺมรณาติ ฯ เวทนา ฯเปฯ สญฺญา ฯ
สงฺขารา ฯ วิญฺญาณํ นิจฺจํ วา อนิจฺจํ วาติ ฯ อนิจฺจํ ภนฺเต
ฯเปฯ วิปริณามธมฺมํ อปิ นุ ตํ อนุปาทาย เอวํ ทิฏฺฐิ
อุปฺปชฺเชยฺย อทุกฺขมสุขี อตฺตา โหติ อโรโค ปรมฺมรณาติ ฯ
โน เหตํ ภนฺเต ฯ อิติ โข ภิกฺขเว ทุกฺเข สติ ทุกฺขํ อุปาทาย
ทุกฺขํ อภินิวิสฺส เอวํ ทิฏฺฐิ อุปฺปชฺชติ อทุกฺขมสุขี อตฺตา โหติ
อโรโค ปรมฺมรณาติ (ทุติยเปยฺยาโล) ฯ
_____________
ม. ยุ. ตสฺสุทฺทานํ
วาตํ เอตํ มม ๑ โส อตฺตา โน จ เม สิยา
นตฺถิ กโรโต เหตุ จ ๒ มหาทิฏฺเฐน อฏฺฐมํ
สสฺสโต อสสฺสโต เจว อนฺตานนฺตวา ๓ จ วุจฺจติ ฯ
ตํ ชีวํ อญฺญํ ชีวญฺจ ตถาคเตน จตฺตาโร
รูปี อตฺตา โหติ อรูปี จ อตฺตา โหติ
รูปี จ อรูปี จ อตฺตา โหติ
เนว รูปี นารูปี อตฺตา โหติ เอกนฺตสุขี อตฺตา โหติ
เอกนฺตทุกฺขี อตฺตา โหติ สุขทุกฺขี อตฺตา โหติ
อทุกฺขมสุขี อตฺตา โหติ อโรโค ปรํ มรณาติ ฯ
อิเม ฉพฺพีสติ สุตฺตา ทุติยวาเรน เทสิตา
#๑ ยุ. มม ฯ ๒ ยุ. เหตุยา ฯ ๓ ยุ. อนฺตานนฺตา ฯ
ทิฏฺฐิสํยุตฺเต ตติยเปยฺยาโล ตติโย ๑

[๔๕๙] สาวตฺถี ฯ ตตฺร โข ฯ กิสฺมึ นุ โข ภิกฺขเว สติ
กึ อุปาทาย กึ อภินิวิสฺส เอวํ ทิฏฺฐิ อุปฺปชฺชติ น วาตา
วายนฺติ น นชฺโช สนฺทนฺติ น คพฺภินิโย วิชายนฺติ น จนฺทิมสุริยา
อุเทนฺติ วา อเปนฺติ วา เอสิกฏฺฐายิฏฺฐิตาติ ฯ ภควํมูลกา โน
ภนฺเต ธมฺมา ฯเปฯ รูเป โข ภิกฺขเว สติ รูปํ อุปาทาย รูปํ
อภินิวิสฺส เอวํ ทิฏฺฐิ อุปฺปชฺชติ น วาตา วายนฺติ ฯเปฯ
เอสิกฏฺฐายิฏฺฐิตาติ ฯ เวทนาย สติ ฯเปฯ สญฺญาย สติ ฯ
สงฺขาเรสุ สติ ฯ วิญฺญาเณ สติ วิญฺญาณํ อุปาทาย วิญฺญาณํ
อภินิวิสฺส เอวํ ทิฏฺฐิ อุปฺปชฺชติ น วาตา วายนฺติ ฯเปฯ
เอสิกฏฺฐายิฏฺฐิตาติ ฯ

[๔๖๐] ตํ กึ มญฺญถ ภิกฺขเว รูปํ นิจฺจํ วา อนิจฺจํ วาติ ฯ
อนิจฺจํ ภนฺเต ฯเปฯ วิปริณามธมฺมํ อปิ นุ ตํ อนุปาทาย
เอวํ ทิฏฺฐิ อุปฺปชฺเชยฺย น วาตา วายนฺติ ฯเปฯ เอสิกฏฺฐายิฏฺฐิตาติ ฯ
โน เหตํ ภนฺเต ฯ อิติ โข ภิกฺขเว ยทนิจฺจํ ตํ
ทุกฺขํ ตสฺมึ สติ ตทุปาทาย เอวํ ทิฏฺฐิ อุปฺปชฺชติ น วาตา
วายนฺติ น นชฺโช สนฺทนฺติ น คพฺภินิโย วิชายนฺติ น จนฺทิมสุริยา
อุเทนฺติ วา อเปนฺติ วา เอสิกฏฺฐายิฏฺฐิตาติ ฯ เวทนา ฯเปฯ
สญฺญา ฯ สงฺขารา ฯ วิญฺญาณํ นิจฺจํ วา อนิจฺจํ วาติ ฯ
#๑ ม. ตติยคมนวคฺค-นวาตสุตฺต ฯ
อนิจฺจํ ภนฺเต ฯเปฯ วิปริณามธมฺมํ อปิ นุ ตํ อนุปาทาย
เอวํ ทิฏฺฐิ อุปฺปชฺเชยฺย น วาตา วายนฺติ ฯเปฯ เอสิกฏฺฐายิฏฺฐิตาติ ฯ
โน เหตํ ภนฺเต ฯ อิติ โข ภิกฺขเว ยทนิจฺจํ ตํ
ทุกฺขํ ตสฺมึ สติ ตทุปาทาย เอวํ ทิฏฺฐิ อุปฺปชฺชติ ฯเปฯ
เอสิกฏฺฐายิฏฺฐิตาติ ฯ (ฉพฺพีสํ วิตฺถาเรตพฺพานิ) ฯ [๑]