[๓๗๑] เย จ โข เกจิ ราธ สมณา วา พฺราหฺมณา วา อิเมสํ
ปญฺจนฺนํ อุปาทานกฺขนฺธานํ อสฺสาทญฺจ อาทีนวญฺจ นิสฺสรณญฺจ
ยถาภูตํ ปชานนฺติ เต โขเม ๑ ราธ สมณา วา พฺราหฺมณา วา
สมเณสุ เจว สมณสมฺมตา พฺราหฺมเณสุ จ พฺราหฺมณสมฺมตา
เต จ ปนายสฺมนฺโต สามญฺญตฺถญฺจ พฺราหฺมญฺญตฺถญฺจ ทิฏฺเฐว
ธมฺเม สยํ อภิญฺญา สจฺฉิกตฺวา อุปสมฺปชฺช วิหรนฺตีติ ฯ

[๓๗๒] เอกมนฺตํ นิสินฺนํ โข อายสฺมนฺตํ ราธํ ภควา เอตทโวจ
ปญฺจิเม ราธ อุปาทานกฺขนฺธา ฯ กตเม ปญฺจ ฯ เสยฺยถีทํ ฯ
รูปูปาทานกฺขนฺโธ เวทนูปาทานกฺขนฺโธ สญฺญูปาทานกฺขนฺโธ
สงฺขารูปาทานกฺขนฺโธ วิญฺญาณูปาทานกฺขนฺโธ ฯ เย หิ เกจิ ราธ
สมณา วา พฺราหฺมณา วา อิเมสํ ปญฺจนฺนํ อุปาทานกฺขนฺธานํ
สมุทยญฺจ อตฺถงฺคมญฺจ อสฺสาทญฺจ อาทีนวญฺจ นิสฺสรณญฺจ
ยถาภูตํ นปฺปชานนฺติ ฯเปฯ สยํ อภิญฺญา สจฺฉิกตฺวา อุปสมฺปชฺช
วิหรนฺตีติ ฯ
#๑ ยุ. เมติ นตฺถิ ฯ

[๓๗๓] สาวตฺถี ฯ เอกมนฺตํ นิสินฺนํ โข อายสฺมนฺตํ ราธํ ภควา
เอตทโวจ ปญฺจิเม ราธ อุปาทานกฺขนฺธา ฯ กตเม ปญฺจ ฯ
เสยฺยถีทํ ฯ รูปูปาทานกฺขนฺโธ ฯเปฯ วิญฺญาณูปาทานกฺขนฺโธ ฯ
ยโต ๑ โข ราธ อริยสาวโก อิเมสํ ปญฺจนฺนํ อุปาทานกฺขนฺธานํ
สมุทยญฺจ อตฺถงฺคมญฺจ อสฺสาทญฺจ อาทีนวญฺจ นิสฺสรณญฺจ
ยถาภูตํ ปชานาติ ฯ อยํ วุจฺจติ ราธ อริยสาวโก โสตาปนฺโน
อวินิปาตธมฺโม นิยโต สมฺโพธิปรายโนติ ฯ

[๓๗๔] สาวตฺถี ฯ ตตฺร โข ฯ เอกมนฺตํ นิสินฺนํ โข อายสฺมนฺตํ
ราธํ ภควา เอตทโวจ ปญฺจิเม ราธ อุปาทานกฺขนฺธา ฯ กตเม
ปญฺจ ฯ เสยฺยถีทํ ฯ รูปูปาทานกฺขนฺโธ ฯเปฯ วิญฺญาณูปาทานกฺขนฺโธ ฯ
ยโต โข ราธ ภิกฺขุ อิเมสํ ปญฺจนฺนํ อุปาทานกฺขนฺธานํ
สมุทยญฺจ อตฺถงฺคมญฺจ อสฺสาทญฺจ อาทีนวญฺจ นิสฺสรณญฺจ
ยถาภูตํ วิทิตฺวา อนุปาทา วิมุตฺโต โหติ ฯ อยํ วุจฺจติ ราธ
ภิกฺขุ อรหํ ขีณาสโว วุสิตวา กตกรณีโย โอหิตภาโร
อนุปฺปตฺตสทตฺโถ ปริกฺขีณภวสญฺโญชโน สมฺมทญฺญา วิมุตฺโตติ ฯ

[๓๗๕] สาวตฺถี ฯ เอกมนฺตํ นิสินฺนํ โข อายสฺมนฺตํ ราธํ
ภควา เอตทโวจ รูเป โข ราธ โย ฉนฺโท โย ราโค ยา
นนฺทิ ยา ตณฺหา ตํ ปชหถ เอวนฺตํ รูปํ ปหีนํ ภวิสฺสติ
อุจฺฉินฺนมูลํ ตาลาวตฺถุกตํ อนภาวงฺกตํ อายตึ อนุปฺปาทธมฺมํ ฯ
เวทนาย โย ฉนฺโท โย ราโค ยา นนฺทิ ยา ตณฺหา ตํ
#๑ ยุ. ยโต จ โข ฯ
ปชหถ เอวํ สา เวทนา ปหีนา ภวิสฺสติ อุจฺฉินฺนมูลา ตาลาวตฺถุกตา
อนภาวงฺกตา อายตึ อนุปฺปาทธมฺมา ฯ สญฺญาย ฯ
สงฺขาเรสุ โย ฉนฺโท โย ราโค ยา นนฺทิ ยา ตณฺหา ตํ
ปชหถ เอวนฺเต สงฺขารา ปหีนา ภวิสฺสนฺติ อุจฺฉินฺนมูลา ตาลา
วตฺถุกตา อนภาวงฺกตา อายตึ อนุปฺปาทธมฺมา ฯ วิญฺญาเณ โย
ฉนฺโท โย ราโค ยา นนฺทิ ยา ตณฺหา ตํ ปชหถ เอวนฺตํ
วิญฺญาณํ ปหีนํ ภวิสฺสติ อุจฺฉินฺนมูลํ ตาลาวตฺถุกตํ อนภาวงฺกตํ
อายตึ อนุปฺปาทธมฺมนฺติ ฯ

[๓๗๖] สาวตฺถี ฯ เอกมนฺตํ นิสินฺนํ โข อายสฺมนฺตํ ราธํ
ภควา เอตทโวจ รูเป โข ราธ โย ฉนฺโท โย ราโค
ยา นนฺทิ ยา ตณฺหา เย อุปายุปาทานา เจตโส อธิฏฺฐานาภินิเวสานุสยา
เต ปชหถ เอวนฺตํ รูปํ ปหีนํ ภวิสฺสติ อุจฺฉินฺนมูลํ
ตาลาวตฺถุกตํ อนภาวงฺกตํ อายตึ อนุปฺปาทธมฺมํ ฯ เวทนาย
โย ฉนฺโท โย ราโค ยา นนฺทิ ยา ตณฺหา เย อุปายุปาทานา
เจตโส อธิฏฺฐานาภินิเวสานุสยา เต ปชหถ เอวํ สา เวทนา
ปหีนา ภวิสฺสติ อุจฺฉินฺนมูลา ตาลาวตฺถุกตา อนภาวงฺกตา อายตึ
อนุปฺปาทธมฺมา ฯ สญฺญาย ฯ สงฺขาเรสุ โย ฉนฺโท โย ราโค
ยา นนฺทิ ยา ตณฺหา เย อุปายุปาทานา เจตโส อธิฏฺฐานาภินิเวสานุสยา
เต ปชหถ เอวนฺเต สงฺขารา ปหีนา ภวิสฺสนฺติ
อุจฺฉินฺนมูลา ตาลาวตฺถุกตา อนภาวงฺกตา อายตึ อนุปฺปาทธมฺมา ฯ
วิญฺญาเณ โย ฉนฺโท โย ราโค ยา นนฺทิ ยา ตณฺหา เย
อุปายุปาทานา เจตโส อธิฏฺฐานาภินิเวสานุสยา เต ปชหถ เอวนฺตํ
วิญฺญาณํ ปหีนํ ภวิสฺสติ อุจฺฉินฺนมูลํ ตาลาวตฺถุกตํ อนภาวงฺกตํ
อายตึ อนุปฺปาทธมฺมนฺติ ฯ
ราธสํยุตฺตสฺส ปฐโม วคฺโค ฯ
ตสฺสุทฺทานํ
มาโร สตฺโต ภวเนตฺติ ปริญฺเญยฺยา สมณา ทุเว
โสตาปนฺโน อรหา จ ฉนฺทราคา อปเร ทุเวติ ฯ
______________
ราธสํยุตฺเต ทุติยวคฺโค ทุติโย

[๓๗๗] สาวตฺถี ฯ อถ โข อายสฺมา ราโธ เยน ภควา
เตนุปสงฺกมิ อุปสงฺกมิตฺวา ภควนฺตํ อภิวาเทตฺวา เอกมนฺตํ
นิสีทิ ฯ เอกมนฺตํ นิสินฺโน โข อายสฺมา ราโธ ภควนฺตํ เอตทโวจ
มาโร มาโรติ ภนฺเต วุจฺจติ กตโม นุ โข ภนฺเต มาโรติ ฯ
รูปํ โข ราธ มาโร เวทนา มาโร สญฺญา มาโร สงฺขารา
มาโร วิญฺญาณํ มาโร ฯ เอวํ ปสฺสํ ราธ สุตวา อริยสาวโก
รูปสฺมึปิ นิพฺพินฺทติ เวทนายปิ นิพฺพินฺทติ สญฺญายปิ นิพฺพินฺทติ
สงฺขาเรสุปิ นิพฺพินฺทติ วิญฺญาณสฺมึปิ นิพฺพินฺทติ นิพฺพินฺทํ
วิรชฺชติ วิราคา วิมุจฺจติ ฯ วิมุตฺตสฺมึ วิมุตฺตมิติ ญาณํ
โหติ ฯ ขีณา ชาติ วุสิตํ พฺรหฺมจริยํ กตํ กรณียํ นาปรํ
อิตฺถตฺตายาติ ปชานาตีติ ฯ

[๓๗๘] สาวตฺถี ฯ เอกมนฺตํ นิสินฺโน โข อายสฺมา ราโธ
ภควนฺตํ เอตทโวจ มารธมฺโม มารธมฺโมติ ภนฺเต วุจฺจติ กตโม
นุ โข ภนฺเต มารธมฺโมติ ฯ รูปํ โข ราธ มารธมฺโม เวทนา
มารธมฺโม สญฺญา มารธมฺโม สงฺขารา มารธมฺโม วิญฺญาณํ
มารธมฺโม ฯ เอวํ ปสฺสํ ฯเปฯ นาปรํ อิตฺถตฺตายาติ ปชานาตีติ ฯ

[๓๗๙] สาวตฺถิยํ ฯ เอกมนฺตํ นิสินฺโน โข อายสฺมา ราโธ
ภควนฺตํ เอตทโวจ อนิจฺจํ อนิจฺจนฺติ ภนฺเต วุจฺจติ กตมํ
นุ โข ภนฺเต อนิจฺจนฺติ ฯ รูปํ โข ราธ อนิจฺจํ เวทนา
อนิจฺจา สญฺญา ฯเปฯ วิญฺญาณํ อนิจฺจํ ฯ เอวํ ปสฺสํ ฯเปฯ
นาปรํ อิตฺถตฺตายาติ ปชานาตีติ ฯ

[๓๘๐] สาวตฺถี ฯ เอกมนฺตํ นิสินฺโน โข อายสฺมา ราโธ
ภควนฺตํ เอตทโวจ อนิจฺจธมฺโม อนิจฺจธมฺโมติ ภนฺเต วุจฺจติ
กตโม นุ โข ภนฺเต อนิจฺจธมฺโม ฯ รูปํ โข ราธ อนิจฺจธมฺโม
เวทนา อนิจฺจธมฺโม สญฺญา อนิจฺจธมฺโม สงฺขารา อนิจฺจธมฺโม
วิญฺญาณํ อนิจฺจธมฺโม ฯ เอวํ ปสฺสํ ฯเปฯ นาปรํ อิตฺถตฺตายาติ
ปชานาตีติ ฯ