[๖๕๙] อทฺทสํ สามเณรํ เวหาสํ คจฺฉนฺตํ ตสฺส สงฺฆาฏิปิ
อาทิตฺตา ฯเปฯ ปาปสามเณโร อโหสิ ฯ ทสมํ ฯ

[๖๖๐] อิธาหํ อาวุโส คิชฺฌกูฏา ปพฺพตา โอโรหนฺโต อทฺทสํ
สามเณรึ เวหาสํ คจฺฉนฺตึ ตสฺสา สงฺฆาฏิปิ อาทิตฺตา สมฺปชฺชลิตา
สญฺโชติภูตา ปตฺโตปิ อาทิตฺโต สมฺปชฺชลิโต สญฺโชติภูโต
กายพนฺธนมฺปิ อาทิตฺตํ สมฺปชฺชลิตํ สญฺโชติภูตํ กาโยปิ อาทิตฺโต
สมฺปชฺชลิโต สญฺโชติภูโต สา สุทํ อฏฺฏสฺสรํ กโรติ ฯ ตสฺส
มยฺหํ อาวุโส เอตทโหสิ อจฺฉริยํ วต โภ อพฺภูตํ วต โภ
เอวรูโปปิ นาม สตฺโต ภวิสฺสติ เอวรูโปปิ นาม ยกฺโข ภวิสฺสติ
เอวรูโปปิ นาม อตฺตภาวปฏิลาโภ ภวิสฺสตีติ ฯ

[๖๖๑] อถ โข ภควา ภิกฺขู อามนฺเตสิ จกฺขุภูตา วต
ภิกฺขเว สาวกา วิหรนฺติ ญาณภูตา วต ภิกฺขเว สาวกา วิหรนฺติ
ยตฺร หิ นาม สาวโก เอวรูปํ ญสฺสติ วา ทกฺขติ วา สกฺขึ วา
กริสฺสติ ฯ ปุพฺเพว ๑ เม สา ภิกฺขเว สามเณรี ทิฏฺฐา อโหสิ ฯ
อปิจาหํ น พฺยากาสึ อหญฺเจตํ พฺยากเรยฺยํ ปเรปิ ๒ เม น
สทฺทเหยฺยุํ เย เม น สทฺทเหยฺยุํ เตสํ ตํ อสฺส ทีฆรตฺตํ
#๑ ยุ. ปุพฺเพปิ ฯ ๒ ม. ยุ. ปเร จ ฯ
อหิตาย ทุกฺขาย ฯ เอสา ภิกฺขเว สามเณรี กสฺสปสฺส
สมฺมาสมฺพุทฺธสฺส ปาวจเน ปาปสามเณรี อโหสิ สา ตสฺส กมฺมสฺส
วิปาเกน พหูนิ วสฺสานิ พหูนิ วสฺสสตานิ พหูนิ วสฺสสหสฺสานิ
พหูนิ วสฺสสตสหสฺสานิ นิรเย ปจิตฺถ ๑ ตสฺเสว กมฺมสฺส
วิปากาวเสเสน เอวรูปํ อตฺตภาวปฏิลาภํ ปฏิสํเวทยตีติ ฯ เอกาทสมํ ฯ
ทุติยวคฺโค ทุติโย ฯ
ตสฺส อุทฺทานํ
กูเป นิมุคฺโค หิ โส ปรทาริโก
คูถขาทิ อหุ ทุฏฺฐพฺราหฺมโณ
นิจฺฉวิตฺถี อติจารินี อหุ
มงฺคุฬิตฺถี อหุ อิกฺขณิตฺถิกา ๒
โอกิลินี สปตึ กโรติ ๓
สีสจฺฉินฺโน อหุ โจรฆาตโก
ภิกฺขุ ภิกฺขุนี สิกฺขมานา
สามเณโร อถ สามเณริกา ๔
กสฺสปสฺส วินยสฺส ๕ ปพฺพชฺชํ ๖
ปาปกมฺมํ อกรึสุ ตาวเท ๗ ฯ
ลกฺขณสํยุตฺตํ สตฺตมํ สมตฺตํ ฯ
___________
#๑ ม. ปจิตฺวา ฯ ๒ ยุ. อิกฺขณิตฺถิ ยา ฯ ๓ ม. ยุ. สปตฺตงฺคาโรกิริ ฯ ๔ ยุ.
#สามเณริโย ฯ ๕ ม. ยุ. วินยสฺมึ ฯ ๖ ยุ. ปพฺพชฺชุํ ฯ ๗ ม. ยุ. อิติสทฺโท อตฺถิ ฯ
โอปมฺมสํยุตฺตํ

[๖๖๒] เอวมฺเม สุตํ เอกํ สมยํ ภควา สาวตฺถิยํ วิหรติ
เชตวเน อนาถปิณฺฑิกสฺส อาราเม ฯ ตตฺร โข ภควา … เสยฺยถาปิ
ภิกฺขเว กูฏาคารสฺส ยากาจิ โคปานสิโย สพฺพา ตา กูฏงฺคมา
กูฏสโมสรณา กูฏสมุคฺฆาตา สพฺพา ตา สมุคฺฆาตํ คจฺฉนฺติ
เอวเมว โข ภิกฺขเว เยเกจิ อกุสลา ธมฺมา สพฺเพ เต อวิชฺชามูลกา
อวิชฺชาสโมสรณา อวิชฺชาสมุคฺฆาตา สพฺเพ เต สมุคฺฆาตํ
คจฺฉนฺติ ฯ ตสฺมาติห ภิกฺขเว เอวํ สิกฺขิตพฺพํ อปฺปมตฺตา
วิหริสฺสามาติ เอวญฺหิ โว ภิกฺขเว สิกฺขิตพฺพนฺติ ฯ ปฐมํ ฯ

[๖๖๓] สาวตฺถิยํ วิหรติ … อถ โข ภควา ปริตฺตํ นขสิขายํ
ปํสุํ อาโรเปตฺวา ภิกฺขู อามนฺเตสิ ตํ กึ มญฺญถ ภิกฺขเว
กตมํ นุ โข พหุตรํ โย จายํ มยา ปริตฺโต นขสิขายํ ปํสุ
อาโรปิโต ยา จายํ มหาปฐวีติ ฯ เอตเทว ภนฺเต พหุตรํ ยทิทํ
มหาปฐวี อปฺปมตฺตโกยํ ภควตา ปริตฺโต นขสิขายํ ปํสุ อาโรปิโต
สงฺขมฺปิ น อุเปติ อุปนิธมฺปิ น อุเปติ กลภาคมฺปิ น อุเปติ
มหาปฐวึ อุปนิธาย ภควตา ปริตฺโต นขสิขายํ ปํสุ อาโรปิโตติ ฯ

[๖๖๔] เอวเมว โข ภิกฺขเว อปฺปกา เต สตฺตา เย
มนุสฺเสสุ ปจฺจาชายนฺติ อถ โข เอเตเยว พหุตรา สตฺตา เย
อญฺญตฺร มนุสฺเสหิ ปจฺจาชายนฺติ ฯ ตสฺมาติห ภิกฺขเว เอวํ
สิกฺขิตพฺพํ อปฺปมตฺตา วิหริสฺสามาติ เอวญฺหิ โว ภิกฺขเว
สิกฺขิตพฺพนฺติ ฯ ทุติยํ ฯ

[๖๖๕] สาวตฺถิยํ วิหรติ … ตตฺร โข ภควา … เสยฺยถาปิ
ภิกฺขเว ยานิกานิจิ กุลานิ พหุตฺถิกานิ อปฺปปุริสานิ ตานิ
สุปธํสิยานิ โหนฺติ โจเรหิ กุมฺภตฺเถนเกหิ ฯ เอวเมว โข ภิกฺขเว
ยสฺสกสฺสจิ ภิกฺขุโน เมตฺตา เจโตวิมุตฺติ อภาวิตา อพหุลีกตา
โส สุปธํสิโย โหติ อมนุสฺเสหิ ฯ

[๖๖๖] เสยฺยถาปิ ภิกฺขเว ยานิกานิจิ กุลานิ อปฺปตฺถิกานิ ๑
พหุปุริสานิ ตานิ ทุปฺปธํสิยานิ โหนฺติ โจเรหิ กุมฺภตฺเถนเกหิ
เอวเมว โข ภิกฺขเว ยสฺสกสฺสจิ ภิกฺขุโน เมตฺตา เจโตวิมุตฺติ
ภาวิตา พหุลีกตา โส ทุปฺปธํสิโย โหติ อมนุสฺเสหิ ฯ ตสฺมาติห
ภิกฺขเว เอวํ สิกฺขิตพฺพํ เมตฺตา โน เจโตวิมุตฺติ ภาวิตา ภวิสฺสติ
พหุลีกตา ยานีกตา วตฺถุกตา อนุฏฺฐิตา ปริจิตา สุสมารทฺธาติ
เอวญฺหิ โว ภิกฺขเว สิกฺขิตพฺพนฺติ ฯ ตติยํ ฯ

[๖๖๗] สาวตฺถิยํ วิหรติ … โย ภิกฺขเว ปุพฺพณฺหสมยํ
โอกฺขาสตํ ๒ ทานํ ทเทยฺย โย มชฺฌนฺติกสมยํ โอกฺขาสตํ ทานํ ทเทยฺย
โย สายณฺหสมยํ โอกฺขาสตํ ทานํ ทเทยฺย โย วา ปุพฺพณฺหสมยํ
อนฺตมโส คทฺทูหนมตฺตมฺปิ เมตฺตจิตฺตํ ภาเวยฺย โย วา
มชฺฌนฺติกสมยํ อนฺตมโส คทฺทูหนมตฺตมฺปิ เมตฺตจิตฺตํ ภาเวยฺย
#๑ ม. ยุ. อปฺปิตฺถิกานิ ฯ ๒ อุกฺกาสตนฺติปิ ปาโฐ ฯ
โย วา สายณฺหสมยํ อนฺตมโส คทฺทูหนมตฺตมฺปิ เมตฺตจิตฺตํ
ภาเวยฺย อิทํ ตโต มหปฺผลตรํ ฯ ตสฺมาติห ภิกฺขเว เอวํ
สิกฺขิตพฺพํ เมตฺตา โน เจโตวิมุตฺติ ภาวิตา ภวิสฺสติ พหุลีกตา
ยานีกตา วตฺถุกตา อนุฏฺฐิตา ปริจิตา สุสมารทฺธาติ เอวญฺหิ โว
ภิกฺขเว สิกฺขิตพฺพนฺติ ฯ จตุตฺถํ ฯ

[๖๖๘] สาวตฺถิยํ วิหรติ … เสยฺยถาปิ ภิกฺขเว สตฺติ ติณฺหผลา
อถ ปุริโส อาคจฺเฉยฺย อหํ อิมํ สตฺตึ ติณฺหผลํ ปาณินา วา
มุฏฺฐินา วา ปฏิเลณิสฺสามิ ปฏิโกฏฺเฏสฺสามิ ๑ ปฏิวฏฺเฏสฺสามีติ ฯ
ตํ กึ มญฺญถ ภิกฺขเว ภพฺโพ นุ โข โส ปุริโส อมุํ สตฺตึ
ติณฺหผลํ ปาณินา วา มุฏฺฐินา วา ปฏิเลเณตุํ ปฏิโกฏฺเฏตุํ
ปฏิวฏฺเฏตุนฺติ ฯ โน เหตํ ภนฺเต ฯ ตํ กิสฺส เหตุ ฯ อสุ หิ
ภนฺเต สตฺติ ติณฺหผลา น สุกรา ปาณินา วา มุฏฺฐินา วา
ปฏิเลเณตุํ ปฏิโกฏฺเฏตุํ ปฏิวฏฺเฏตุํ ยาวเทว จ ปน โส ปุริโส
กิลมถสฺส วิฆาตสฺส ภาคี อสฺสาติ ฯ