[๕๙๙] เอวมฺเม สุตํ เอกํ สมยํ ภควา สาวตฺถิยํ วิหรติ
เชตวเน อนาถปิณฺฑิกสฺส อาราเม ฯ อถ โข อายสฺมา ราหุโล
เยน ภควา เตนุปสงฺกมิ อุปสงฺกมิตฺวา ภควนฺตํ อภิวาเทตฺวา
เอกมนฺตํ นิสีทิ ฯ เอกมนฺตํ นิสินฺโน โข อายสฺมา ราหุโล
ภควนฺตํ เอตทโวจ สาธุ เม ภนฺเต ภควา สงฺขิตฺเตน ธมฺมํ
เทเสตุ ยมหํ ภควโต ธมฺมํ สุตฺวา เอโก วูปกฏฺโฐ อปฺปมตฺโต
อาตาปี ปหิตตฺโต วิหเรยฺยนฺติ ฯ
[๖๐๐] ตํ กึ มญฺญสิ ราหุล จกฺขุํ นิจฺจํ วา อนิจฺจํ วาติ ฯ
อนิจฺจํ ภนฺเต ฯ ยํ ปนานิจฺจํ ทุกฺขํ วา ตํ สุขํ วาติ ฯ ทุกฺขํ
ภนฺเต ฯ ยํ ปนานิจฺจํ ทุกฺขํ วิปริณามธมฺมํ กลฺลํ นุ ตํ สมนุปสฺสิตุํ
เอตํ มม เอโสหมสฺมิ เอโส เม อตฺตาติ ฯ โน
เหตํ ภนฺเต ฯ
[เอวํ เปยฺยาโล]
โสตํ นิจฺจํ วา อนิจฺจํ วาติ ฯ อนิจฺจํ ภนฺเต … ฆานํ นิจฺจํ วา
อนิจฺจํ วาติ ฯ อนิจฺจํ ภนฺเต … ชิวฺหา นิจฺจา วา อนิจฺจา วาติ ฯ
อนิจฺจา ภนฺเต … กาโย นิจฺโจ วา อนิจฺโจ วาติ ฯ อนิจฺโจ
ภนฺเต … มโน นิจฺโจ วา อนิจฺโจ วาติ ฯ อนิจฺโจ ภนฺเต ฯ
ยํ ปนานิจฺจํ ทุกฺขํ วา ตํ สุขํ วาติ ฯ ทุกฺขํ ภนฺเต ฯ ยํ ปนานิจฺจํ
ทุกฺขํ วิปริณามธมฺมํ กลฺลํ นุ ตํ สมนุปสฺสิตุํ เอตํ มม เอโสหมสฺมิ
เอโส เม อตฺตาติ ฯ โน เหตํ ภนฺเต ฯ
[๖๐๑] เอวํ ปสฺสํ ราหุล สุตวา อริยสาวโก จกฺขุสฺมิมฺปิ
นิพฺพินฺทติ โสตสฺมิมฺปิ นิพฺพินฺทติ ฆานสฺมิมฺปิ นิพฺพินฺทติ ชิวฺหายปิ
นิพฺพินฺทติ กายสฺมิมฺปิ นิพฺพินฺทติ มนสฺมิมฺปิ นิพฺพินฺทติ นิพฺพินฺทํ
วิรชฺชติ วิราคา วิมุจฺจติ ฯ วิมุตฺตสฺมึ วิมุตฺตมิติ ๑ ญาณํ โหติ ฯ
ขีณา ชาติ วุสิตํ พฺรหฺมจริยํ กตํ กรณียํ นาปรํ อิตฺถตฺตายาติ
ปชานาตีติ ฯ ปฐมํ ฯ
[เอเตน เปยฺยาเลน ทส สุตฺตนฺตา กาตพฺพา]
[๖๐๒] สาวตฺถิยํ วิหรติ … ตํ กึ มญฺญสิ ราหุล รูปา นิจฺจา
วา อนิจฺจา วาติ ฯ อนิจฺจา ภนฺเต … สทฺทา ฯเปฯ คนฺธา …
รสา … โผฏฺฐพฺพา … ธมฺมา นิจฺจา วา อนิจฺจา วาติ ฯ อนิจฺจา
ภนฺเต … ฯ
[๖๐๓] เอวํ ปสฺสํ ราหุล สุตวา อริยสาวโก รูเปสุปิ
นิพฺพินฺทติ สทฺเทสุปิ นิพฺพินฺทติ คนฺเธสุปิ นิพฺพินฺทติ รเสสุปิ
นิพฺพินฺทติ โผฏฺฐพฺเพสุปิ นิพฺพินฺทติ ธมฺเมสุปิ นิพฺพินฺทติ นิพฺพินฺทํ
วิรชฺชติ ฯเปฯ ปชานาตีติ ฯ ทุติยํ ฯ
#๑ กตฺถจิ วิมุตฺตมฺหีตีติปิ ปาโฐ ทิสฺสติ ฯ
[๖๐๔] สาวตฺถิยํ วิหรติ … ตํ กึ มญฺญสิ ราหุล
จกฺขุวิญฺญาณํ นิจฺจํ วา อนิจฺจํ วาติ ฯ อนิจฺจํ ภนฺเต …
โสตวิญฺญาณํ ฯเปฯ ฆานวิญฺญาณํ … ชิวฺหาวิญฺญาณํ …
กายวิญฺญาณํ … มโนวิญฺญาณํ นิจฺจํ วา อนิจฺจํ วาติ ฯ อนิจฺจํ
ภนฺเต … ฯ
[๖๐๕] เอวํ ปสฺสํ ราหุล สุตวา อริยสาวโก จกฺขุวิญฺญาณสฺมิมฺปิ
นิพฺพินฺทติ โสตวิญฺญาณสฺมิมฺปิ นิพฺพินฺทติ ฆานวิญฺญาณสฺมิมฺปิ
นิพฺพินฺทติ ชิวฺหาวิญฺญาณสฺมิมฺปิ นิพฺพินฺทติ กายวิญฺญาณสฺมิมฺปิ
นิพฺพินฺทติ มโนวิญฺญาณสฺมิมฺปิ นิพฺพินฺทติ
นิพฺพินฺทํ วิรชฺชติ ฯเปฯ ปชานาตีติ ฯ ตติยํ ฯ
[๖๐๖] สาวตฺถิยํ วิหรติ … ตํ กึ มญฺญสิ ราหุล จกฺขุสมฺผสฺโส
นิจฺโจ วา อนิจฺโจ วาติ ฯ อนิจฺโจ ภนฺเต … โสตสมฺผสฺโส
ฯเปฯ ฆานสมฺผสฺโส … ชิวฺหาสมฺผสฺโส … กายสมฺผสฺโส …
มโนสมฺผสฺโส นิจฺโจ วา อนิจฺโจ วาติ ฯ อนิจฺโจ ภนฺเต … ฯ
[๖๐๗] เอวํ ปสฺสํ ราหุล สุตวา อริยสาวโก จกฺขุสมฺผสฺสสฺมิมฺปิ
นิพฺพินฺทติ โสตสมฺผสฺสสฺมิมฺปิ นิพฺพินฺทติ ฆานสมฺผสฺสสฺมิมฺปิ
นิพฺพินฺทติ ชิวฺหาสมฺผสฺสสฺมิมฺปิ นิพฺพินฺทติ กายสมฺผสฺสสฺมิมฺปิ
นิพฺพินฺทติ มโนสมฺผสฺสสฺมิมฺปิ นิพฺพินฺทติ นิพฺพินฺทํ
วิรชฺชติ ฯเปฯ ปชานาตีติ ฯ จตุตฺถํ ฯb
[๖๐๘] สาวตฺถิยํ วิหรติ … ตํ กึ มญฺญสิ ราหุล จกฺขุสมฺผสฺสชาเวทนา
นิจฺจา วา อนิจฺจา วาติ ฯ อนิจฺจา ภนฺเต … โสตสมฺผสฺสชาเวทนา
ฯเปฯ ฆานสมฺผสฺสชาเวทนา … ชิวฺหาสมฺผสฺสชาเวทนา …
กายสมฺผสฺสชาเวทนา … มโนสมฺผสฺสชาเวทนา นิจฺจา วา
อนิจฺจา วาติ ฯ อนิจฺจา ภนฺเต … ฯ