[๕๗๙] เสยฺยถาปิ ภิกฺขเว พลวา ปุริโส ทฬฺหาย พาลรชฺชุยา
ชงฺฆํ เวเฐตฺวา ฆํเสยฺย สา ฉวึ ฉินฺเทยฺย ฉวึ เฉตฺวา จมฺมํ
ฉินฺเทยฺย จมฺมํ เฉตฺวา มํสํ ฉินฺเทยฺย มํสํ เฉตฺวา นหารุํ
ฉินฺเทยฺย นหารุํ เฉตฺวา อฏฺฐึ ฉินฺเทยฺย อฏฺฐึ เฉตฺวา อฏฺฐิ-
มิญฺชํ อาหจฺจ ติฏฺเฐยฺย ฯ เอวเมว โข ภิกฺขเว ลาภสกฺการ-
สิโลโก ฉวึ ฉินฺทติ ฉวึ เฉตฺวา จมฺมํ ฉินฺทติ จมฺมํ เฉตฺวา
มํสํ ฉินฺทติ มํสํ เฉตฺวา นหารุํ ฉินฺทติ นหารุํ เฉตฺวา อฏฺฐึ
ฉินฺทติ อฏฺฐึ เฉตฺวา อฏฺฐิมิญฺชํ อาหจฺจ ติฏฺฐติ ฯ เอวํ
ทารุโณ โข ภิกฺขเว ลาภสกฺการสิโลโก ฯเปฯ เอวญฺหิ โว
ภิกฺขเว สิกฺขิตพฺพนฺติ ฯ นวมํ ฯ

[๕๘๐] สาวตฺถิยํ วิหรติ … ตตฺร โข ภควา … โยปิ โส
ภิกฺขเว ภิกฺขุ อรหํ ขีณาสโว ตสฺสปหํ ๑ ลาภสกฺการสิโลกํ ๒
อนฺตรายาย วทามีติ ฯ เอวํ วุตฺเต อายสฺมา อานนฺโท ภควนฺตํ
เอตทโวจ กิสฺส ปน ภนฺเต ขีณาสวสฺส ภิกฺขุโน ลาภสกฺการสิโลโก
อนฺตรายายาติ ฯ

[๕๘๑] ยา หิสฺส สา อานนฺท อกุปฺปา เจโตวิมุตฺติ นาหํ
ตสฺสา ลาภสกฺการสิโลกํ อนฺตรายาย วทามิ ฯ เย จ ขฺวสฺส
โว ๓ อานนฺท อปฺปมตฺตสฺส อาตาปิโน ปหิตตฺตสฺส วิหรโต ทิฏฺฐธมฺม-
สุขวิหารา อธิคตา เตสาหมสฺส ลาภสกฺการสิโลกํ อนฺตรายาย
วทามิ ฯ เอวํ ทารุโณ โข อานนฺท ลาภสกฺการสิโลโก
กฏุโก ผรุโส อนฺตรายิโก อนุตฺตรสฺส โยคกฺเขมสฺส อธิคมาย ฯ
ตสฺมาติห อานนฺท เอวํ สิกฺขิตพฺพํ อุปฺปนฺนํ ลาภสกฺการสิโลกํ
ปชหิสฺสาม น จ โน อุปฺปนฺโน ลาภสกฺการสิโลโก จิตฺตํ ปริยาทาย
ฐสฺสตีติ ฯ เอวญฺหิ โว อานนฺท สิกฺขิตพฺพนฺติ ฯ ทสมํ ฯ
ตติยวคฺโค ตติโย ฯ
#๑ ม. ยุ. ตสฺสปาหํ ฯ ๒ ม. ลาภสกฺการสิโลโก ฯ ๓ ม. ยุ. โวสทฺโท นตฺถิ ฯ
ตสฺส อุทฺทานํ
มาตุคาโม จ กลฺยาณี ปุตฺโต จ เอกธีตุยา
สมณพฺราหฺมณา ตีณิ ฉวิ รชฺชุ จ ภิกฺขุนาติ ฯ
___________
จตุตฺถวคฺโค จตุตฺโถ

[๕๘๒] สาวตฺถิยํ วิหรติ … ตตฺร โข ภควา … ทารุโณ
ภิกฺขเว ลาภสกฺการสิโลโก ฯเปฯ ลาภสกฺการสิโลเกน อภิภูโต
ปริยาทินฺนจิตฺโต ภิกฺขเว เทวทตฺโต สงฺฆํ ภินฺทิ ฯ เอวํ ทารุโณ
โข ภิกฺขเว ลาภสกฺการสิโลโก ฯเปฯ สิกฺขิตพฺพนฺติ ฯ ปฐมํ ฯ

[๕๘๓] สาวตฺถิยํ วิหรติ … ตตฺร โข ภควา … ทารุโณ
ภิกฺขเว ลาภสกฺการสิโลโก ฯเปฯ ลาภสกฺการสิโลเกน อภิภูตสฺส
ปริยาทินฺนจิตฺตสฺส ภิกฺขเว เทวทตฺตสฺส กุสลมูลํ สมุจฺเฉทมคมา ฯ
เอวํ ทารุโณ โข ภิกฺขเว ลาภสกฺการสิโลโก ฯเปฯ
สิกฺขิตพฺพนฺติ ฯ ทุติยํ ฯ

[๕๘๔] สาวตฺถิยํ วิหรติ … ตตฺร โข ภควา … ทารุโณ
ภิกฺขเว ลาภสกฺการสิโลโก ฯเปฯ ลาภสกฺการสิโลเกน อภิภูตสฺส
ปริยาทินฺนจิตฺตสฺส ภิกฺขเว เทวทตฺตสฺส กุสโล ธมฺโม สมุจฺเฉทมคมา ฯ
เอวํ ทารุโณ โข ภิกฺขเว ลาภสกฺการสิโลโก ฯเปฯ
สิกฺขิตพฺพนฺติ ฯ ตติยํ ฯ

[๕๘๕] สาวตฺถิยํ วิหรติ … ตตฺร โข ภควา … ทารุโณ
ภิกฺขเว ลาภสกฺการสิโลโก ฯเปฯ ลาภสกฺการสิโลเกน อภิภูตสฺส
ปริยาทินฺนจิตฺตสฺส ภิกฺขเว เทวทตฺตสฺส สุกฺโก ธมฺโม สมุจฺ-
เฉทมคมา ฯ เอวํ ทารุโณ โข ภิกฺขเว ลาภสกฺการสิโลโก ฯเปฯ
สิกฺขิตพฺพนฺติ ฯ จตุตฺถํ ฯ

[๕๘๖] เอกํ สมยํ ภควา ราชคเห วิหรติ คิชฺฌกูเฏ ปพฺพเต ฯ
อจิรปกฺกนฺเต เทวทตฺเต ตตฺร โข ภควา เทวทตฺตํ อารพฺภ ภิกฺขู
อามนฺเตสิ อตฺตวธาย ภิกฺขเว เทวทตฺตสฺส ลาภสกฺการสิโลโก
อุทปาทิ ปราภวาย เทวทตฺตสฺส ลาภสกฺการสิโลโก อุทปาทิ ฯ

[๕๘๗] เสยฺยถาปิ ภิกฺขเว กทลี อตฺตวธาย ผลํ เทติ
ปราภวาย ผลํ เทติ ฯ เอวเมว โข ภิกฺขเว อตฺตวธาย
เทวทตฺตสฺส ลาภสกฺการสิโลโก อุทปาทิ ปราภวาย เทวทตฺตสฺส
ลาภสกฺการสิโลโก อุทปาทิ ฯ

[๕๘๘] เสยฺยถาปิ ภิกฺขเว เวฬุ อตฺตวธาย ผลํ เทติ
ปราภวาย ผลํ เทติ ฯ เอวเมว โข ภิกฺขเว อตฺตวธาย
เทวทตฺตสฺส ลาภสกฺการสิโลโก อุทปาทิ ปราภวาย เทวทตฺตสฺส
ลาภสกฺการสิโลโก อุทปาทิ ฯ