[๕๓๙] เสยฺยถาปิ ภิกฺขเว พาฬิสิโก อามิสคตํ พฬิสํ คมฺภีเร
อุทกรหเท ปกฺขิเปยฺย ตเมนํ อญฺญตโร อามิสจกฺขุ มจฺโฉ
คิเลยฺย เอวญฺหิ โส ภิกฺขเว มจฺโฉ คิลพฬิโส พาฬิสิกสฺส อนยํ
อาปนฺโน พฺยสนํ อาปนฺโน ยถากามกรณีโย พาฬิสิกสฺส ฯ

[๕๔๐] พาฬิสิโกติ โข ภิกฺขเว มารสฺเสตํ ปาปิมโต อธิวจนํ ฯ
พฬิสนฺติ โข ภิกฺขเว ลาภสกฺการสิโลกสฺเสตํ อธิวจนํ ฯ โย หิ
โกจิ ภิกฺขเว ภิกฺขุ อุปฺปนฺนํ ลาภสกฺการสิโลกํ อสฺสาเทติ นิกาเมติ
อยํ วุจฺจติ ภิกฺขเว ภิกฺขุ คิลพฬิโส มารสฺส อนยํ อาปนฺโน พฺยสนํ
อาปนฺโน ยถากามกรณีโย ปาปิมโต ฯ เอวํ ทารุโณ โข ภิกฺขเว
ลาภสกฺการสิโลโก กฏุโก ผรุโส อนฺตรายิโก อนุตฺตรสฺส
โยคกฺเขมสฺส อธิคมาย ฯ

[๕๔๑] ตสฺมาติห ภิกฺขเว เอวํ สิกฺขิตพฺพํ อุปฺปนฺนํ
ลาภสกฺการสิโลกํ ปชหิสฺสาม น จ โน อุปฺปนฺโน ลาภสกฺการสิโลโก
จิตฺตํ ปริยาทาย ฐสฺสตีติ เอวญฺหิ โว ภิกฺขเว
สิกฺขิตพฺพนฺติ ฯ ทุติยํ ฯ

[๕๔๒] สาวตฺถิยํ วิหรติ … ทารุโณ ภิกฺขเว ลาภสกฺการสิโลโก
ฯเปฯ อธิคมาย ฯ

[๕๔๓] ภูตปุพฺพํ ภิกฺขเว อญฺญตรสฺมึ อุทกรหเท มหากุมฺมกุลํ
จิรนิวาสิ อโหสิ ฯ อถ โข ภิกฺขเว อญฺญตโร กุมฺโม เยน
อญฺญตโร กุมฺโม เตนุปสงฺกมิ อญฺญตรํ กุมฺมํ เอตทโวจ มา
โข ตฺวํ ตาต กุมฺม เอตํ ปเทสํ อคมาสีติ ฯ อคมาสิ โข
ภิกฺขเว โส กุมฺโม ตํ ปเทสํ ตเมนํ ลุทฺโธ ปปตาย วิชฺฌิ ฯ
อถ โข ภิกฺขเว โส กุมฺโม เยน โส กุมฺโม เตนุปสงฺกมิ ฯ
อทฺทสา โข ภิกฺขเว โส กุมฺโม ตํ กุมฺมํ ทูรโตว อาคจฺฉนฺตํ
ทิสฺวาน ตํ กุมฺมํ เอตทโวจ กจฺจิ ตฺวํ ตาต กุมฺม น ตํ
ปเทสํ อคมาสีติ ฯ อคมาสึ ขฺวาหํ ตาต กุมฺม ตํ ปเทสนฺติ ฯ
กจฺจิ ปนาปิ ๑ ตาต กุมฺม อกฺขโต อนุปหโตติ ฯ อกฺขโต โขมฺหิ
ตาต กุมฺม อนุปหโต อตฺถิ ปน เม อิทํ สุตฺตกํ ปิฏฺฐิโต
ปิฏฺฐิโต อนุพนฺธนฺติ ฯ ตคฺฆ หิ ๒ ตาต กุมฺม อกฺขโต ๓ ตคฺฆ
อุปหโต เอเตน หิ เต ตาต กุมฺม สุตฺตเกน ปิตโร จ
ปิตามหา จ อนยํ อาปนฺนา พฺยสนํ อาปนฺนา คจฺฉทานิ ตฺวํ ตาต
กุมฺม นทานิ ตฺวํ อมฺหากนฺติ ฯ

[๕๔๔] ลุทฺโธติ โข ภิกฺขเว มารสฺเสตํ ปาปิมโต อธิวจนํ ฯ
ปปตายาติ ๔ โข ภิกฺขเว ลาภสกฺการสิโลกสฺเสตํ อธิวจนํ ฯ สุตฺตกนฺติ
โข ภิกฺขเว นนฺทิราคสฺเสตํ อธิวจนํ ฯ โย หิ โกจิ ภิกฺขเว ภิกฺขุ
อุปฺปนฺนํ ลาภสกฺการสิโลกํ อสฺสาเทติ นิกาเมติ อยํ วุจฺจติ
ภิกฺขเว ภิกฺขุ [๕]- ปปตาย อนยํ อาปนฺโน พฺยสนํ อาปนฺโน ยถากามกรณีโย
ปาปิมโต ฯ เอวํ ทารุโณ โข ภิกฺขเว ลาภสกฺการสิโลโก
ฯเปฯ เอวญฺหิ โว ภิกฺขเว สิกฺขิตพฺพนฺติ ฯ ตติยํ ฯ

[๕๔๕] สาวตฺถิยํ วิหรติ … ทารุโณ ภิกฺขเว ลาภสกฺการสิโลโก
ฯเปฯ อธิคมาย ฯ

[๕๔๖] เสยฺยถาปิ ภิกฺขเว ทีฆโลมิกา เอฬกา กณฺฏกคหนํ
ปวิเสยฺย สา ตตฺร ตตฺร สชฺเชยฺย ตตฺร ตตฺร คเณฺหยฺย ๖ ตตฺร
ตตฺร พชฺเฌยฺย ตตฺร ตตฺร อนยพฺยสนํ อาปชฺเชยฺย เอวเมว โข
ภิกฺขเว อิเธกจฺโจ ภิกฺขุ ลาภสกฺการสิโลเกน อภิภูโต ปริยาทินฺนจิตฺโต
ปุพฺพณฺหสมยํ นิวาเสตฺวา ปตฺตจีวรมาทาย คามํ วา นิคมํ
#๑ ม. ยุ. ปนาสิ ฯ ๒ ม. ยุ. ตคฺฆสิ ฯ ๓ ม. ยุ. ขโต ฯ ๔ ม. ปปตาติ ฯ
#๕ ม. ยุ. คิทฺโธ ฯ ๖ ม. คเยฺหยฺย ฯ
วา ปิณฺฑาย ปวิสติ โส ตตฺร ตตฺร สชฺชติ ตตฺร ตตฺร คยฺหติ
ตตฺร ตตฺร พชฺฌติ ตตฺร ตตฺร อนยพฺยสนํ อาปชฺชติ ฯ เอวํ
ทารุโณ โข ภิกฺขเว ลาภสกฺการสิโลโก ฯเปฯ เอวญฺหิ โว
ภิกฺขเว สิกฺขิตพฺพนฺติ ฯ จตุตฺถํ ฯ

[๕๔๗] สาวตฺถิยํ วิหรติ … ทารุโณ ภิกฺขเว ลาภสกฺการสิโลโกZ
ฯเปฯ อธิคมาย ฯ

[๕๔๘] เสยฺยถาปิ ภิกฺขเว กํสฬกา ๑ คูถาที คูถปูรา ปุณฺณา
คูถสฺส ปูรโต จสฺส มหาคูถปุญฺโช สา เตน อญฺญา กํสฬกา ๑
อติมญฺเญยฺย อหมฺหิ คูถาที คูถปูรา ปุณฺณา คูถสฺส ปูรโต
จ มฺยายํ มหาคูถปุญฺโชติ ฯ เอวเมว โข ภิกฺขเว อิเธกจฺโจ
ภิกฺขุ ลาภสกฺการสิโลเกนาภิภูโต ปริยาทินฺนจิตฺโต ปุพฺพณฺหสมยํ
นิวาเสตฺวา ปตฺตจีวรมาทาย คามํ วา นิคมํ วา ปิณฺฑาย ปวิสติ
โส ตตฺถ ภุตฺตาวี จ โหติ ยาวทตฺโถ นิมนฺติโต จ สฺวาตนาย
ปิณฺฑปาโตปสฺส ๒ ปูโร โส อารามํ คนฺตฺวา ภิกฺขุคณสฺส มชฺเฌว
วิกตฺเถติ ๓ ภุตฺตาวี จมฺหิ ยาวทตฺโถ นิมนฺติโต จมฺหิ สฺวาตนาย
ปิณฺฑปาโต จ มฺยายํ ปูโร ลาภี จมฺหิ จีวรปิณฺฑปาตเสนาสน-
คิลานปจฺจยเภสชฺชปริกฺขารานํ อิเม ปน อญฺเญ ภิกฺขู อปฺปปุญฺญา
อปฺเปสกฺขา น ลาภิโน จีวรปิณฺฑปาตเสนาสนคิลานปจฺจย-
เภสชฺชปริกฺขารานนฺติ ฯ โส เตน ลาภสกฺการสิโลเกน อภิภูโต
ปริยาทินฺนจิตฺโต อญฺเญ เปสเล ภิกฺขู อติมญฺญติ ฯ ตญฺหิ ตสฺส
#๑ ม. มีฬหกา ฯ ยุ. ปิฬหกา ฯ ๒ ม. ยุ. ปิณฺฑปาโต จสฺส ฯ ๓ ม. วิกตฺถติ ฯ
ภิกฺขเว โมฆปุริสสฺส โหติ ทีฆรตฺตํ อหิตาย ทุกฺขาย ฯ เอวํ
ทารุโณ โข ภิกฺขเว ลาภสกฺการสิโลโก ฯเปฯ เอวญฺหิ โว
ภิกฺขเว สิกฺขิตพฺพนฺติ ฯ ปญฺจมํ ฯ