[๓๘๙] สาวตฺถิยํ วิหรติ … ตตฺร โข ภควา … ธาตุโสว
ภิกฺขเว สตฺตา สํสนฺทนฺติ สเมนฺติ กุสีตา กุสีเตหิ สทฺธึ สํสนฺทนฺติ
สเมนฺติ มุฏฺฐสฺสติโน มุฏฺฐสฺสตีหิ สทฺธึ สํสนฺทนฺติ สเมนฺติ
ทุปฺปญฺญา ทุปฺปญฺเญหิ สทฺธึ สํสนฺทนฺติ สเมนฺติ ฯ อารทฺธวิริยา
อารทฺธวิริเยหิ สทฺธึ สํสนฺทนฺติ สเมนฺติ อุปฏฺฐิตสฺสติโน
อุปฏฺฐิตสฺสตีหิ สทฺธึ สํสนฺทนฺติ สเมนฺติ ปญฺญวนฺโต ปญฺญวนฺเตหิ
สทฺธึ สํสนฺทนฺติ สเมนฺตีติ ฯ ทฺวาทสมํ ฯ [เอวํ สพฺพตฺถ
อตีตานาคตปจฺจุปฺปนฺนํ กาตพฺพํ] ฯ
ทุติยวคฺโค ทุติโย ฯ
ตสฺส อุทฺทานํ
สตฺติมํ ๑ สนิทานญฺจ คิญฺชกาวสเถน จ
หีนาธิมุตฺติ จงฺกมํ ๒ สตาปารทฺธสตฺตมํ ๓
อสฺสทฺธมูลกา ปญฺจ จตฺตาโร อหิริกมูลกา
อโนตฺตปฺปมูลกา ตีณิ เทฺว อปฺปสฺสุเตน จ
กุสีตํ เอกกํ วุตฺตํ สุตฺตนฺตา ตีณิ ปญฺจกาติ ๔ ฯ
[๕]-
________________
#๑ ม. ยุ. สตฺติมา ฯ ๒ ยุ. จ กมฺมํ ฯ ๓ ม. สคาถาอสทฺธสตฺตมํ ฯ
#ยุ. สคาถอสทฺธสตฺตมํ ฯ
#๔ ยุ. อโนตฺตปฺปมูลกา ตีณิ เทฺว อปฺปสสุเตน จ
# กุสีตํ เอกกา วุตุตา สุตฺตนฺตา ตีณิ ปญฺจกา สุตฺตํ ฯ
#๕ ม. ยุ. พาวีสติ วุตฺตา สุตฺตา ทุติโย วคฺโค ปวุจฺจตีติ ฯ
ทสกมฺมปถวคฺโค ตติโย

[๓๙๐] สาวตฺถิยํ วิหรติ … ตตฺร โข ภควา … ธาตุโสว
ภิกฺขเว สตฺตา สํสนฺทนฺติ สเมนฺติ อสฺสทฺธา อสฺสทฺเธหิ สทฺธึ
สํสนฺทนฺติ สเมนฺติ อหิริกา อหิริเกหิ สทฺธึ สํสนฺทนฺติ สเมนฺติ
อโนตฺตาปิโน อโนตฺตาปีหิ สทฺธึ สํสนฺทนฺติ สเมนฺติ อสมาหิตา
อสมาหิเตหิ สทฺธึ สํสนฺทนฺติ สเมนฺติ ทุปฺปญฺญา ทุปฺปญฺเญหิ
สทฺธึ สํสนฺทนฺติ สเมนฺติ ฯ สทฺธา สทฺเธหิ สทฺธึ สํสนฺทนฺติ
สเมนฺติ หิริมนา หิริมเนหิ สทฺธึ สํสนฺทนฺติ สเมนฺติ โอตฺตาปิโน
โอตฺตาปีหิ สทฺธึ สํสนฺทนฺติ สเมนฺติ สมาหิตา สมาหิเตหิ สทฺธึ
สํสนฺทนฺติ สเมนฺติ ปญฺญวนฺโต ปญฺญวนฺเตหิ สทฺธึ สํสนฺทนฺติ
สเมนฺตีติ ฯ ปฐมํ ฯ

[๓๙๑] สาวตฺถิยํ วิหรติ … ตตฺร โข ภควา … ธาตุโสว
ภิกฺขเว สตฺตา สํสนฺทนฺติ สเมนฺติ อสฺสทฺธา อสฺสทฺเธหิ สทฺธึ
สํสนฺทนฺติ สเมนฺติ อหิริกา อหิริเกหิ สทฺธึ สํสนฺทนฺติ สเมนฺติ
อโนตฺตาปิโน อโนตฺตาปีหิ สทฺธึ สํสนฺทนฺติ สเมนฺติ ทุสฺสีลา
ทุสฺสีเลหิ สทฺธึ สํสนฺทนฺติ สเมนฺติ ทุปฺปญฺญา ทุปฺปญฺเญหิ สทฺธึ
สํสนฺทนฺติ สเมนฺติ ฯ สทฺธา สทฺเธหิ สทฺธึ สํสนฺทนฺติ สเมนฺติ
หิริมนา หิริมเนหิ สทฺธึ สํสนฺทนฺติ สเมนฺติ โอตฺตาปิโน
โอตฺตาปีหิ สทฺธึ สํสนฺทนฺติ สเมนฺติ สีลวนฺโต สีลวนฺเตหิ สทฺธึ
สํสนฺทนฺติ สเมนฺติ ปญฺญวนฺโต ปญฺญวนฺเตหิ สทฺธึ สํสนฺทนฺติ
สเมนฺตีติ ฯ ทุติยํ ฯ

[๓๙๒] เอวมฺเม สุตํ เอกํ สมยํ ภควา สาวตฺถิยํ วิหรติ
เชตวเน อนาถปิณฺฑิกสฺส อาราเม ฯ ตตฺร โข ภควา ภิกฺขู
อามนฺเตสิ ภิกฺขโวติ ฯ ภทนฺเตติ เต ภิกฺขู ภควโต ปจฺจสฺโสสุํ ฯ

[๓๙๓] ภควา เอตทโวจ ธาตุโสว ภิกฺขเว สตฺตา สํสนฺทนฺติ
สเมนฺติ ปาณาติปาติโน ปาณาติปาตีหิ สทฺธึ สํสนฺทนฺติ สเมนฺติ
อทินฺนาทายิโน อทินฺนาทายีหิ สทฺธึ สํสนฺทนฺติ สเมนฺติ กาเมสุมิจฺฉาจาริโน
กาเมสุมิจฺฉาจารีหิ สทฺธึ สํสนฺทนฺติ สเมนฺติ มุสาวาทิโน
มุสาวาทีหิ สทฺธึ สํสนฺทนฺติ สเมนฺติ สุราเมรยมชฺชปมาทฏฺฐายิโน
สุราเมรยมชฺชปมาทฏฺฐายีหิ สทฺธึ สํสนฺทนฺติ สเมนฺติ ฯ

[๓๙๔] ปาณาติปาตา ปฏิวิรตา ปาณาติปาตา ปฏิวิรเตหิ สทฺธึ
สํสนฺทนฺติ สเมนฺติ อทินฺนาทานา ปฏิวิรตา อทินฺนาทานา
ปฏิวิรเตหิ สทฺธึ สํสนฺทนฺติ สเมนฺติ กาเมสุมิจฺฉาจารา ปฏิวิรตา
กาเมสุมิจฺฉาจารา ปฏิวิรเตหิ สทฺธึ สํสนฺทนฺติ สเมนฺติ มุสาวาทา
ปฏิวิรตา มุสาวาทา ปฏิวิรเตหิ สทฺธึ สํสนฺทนฺติ สเมนฺติ
สุราเมรยมชฺชปมาทฏฺฐานา ปฏิวิรตา สุราเมรยมชฺชปมาทฏฺฐานา
ปฏิวิรเตหิ สทฺธึ สํสนฺทนฺติ สเมนฺตีติ ฯ ตติยํ ฯ

[๓๙๕] สาวตฺถิยํ วิหรติ … ตตฺร โข ภควา … ธาตุโสว
ภิกฺขเว สตฺตา สํสนฺทนฺติ สเมนฺติ ปาณาติปาติโน ปาณาติปาตีหิ
สทฺธึ สํสนฺทนฺติ สเมนฺติ อทินฺนาทายิโน อทินฺนาทายีหิ สทฺธึ
สํสนฺทนฺติ สเมนฺติ กาเมสุมิจฺฉาจาริโน กาเมสุมิจฺฉาจารีหิ สทฺธึ
สํสนฺทนฺติ สเมนฺติ มุสาวาทิโน มุสาวาทีหิ สทฺธึ สํสนฺทนฺติ สเมนฺติ
ปิสุณวาจา ปิสุณวาเจหิ สทฺธึ สํสนฺทนฺติ สเมนฺติ ผรุสวาจา
ผรุสวาเจหิ สทฺธึ สํสนฺทนฺติ สเมนฺติ สมฺผปฺปลาปิโน
สมฺผปฺปลาปีหิ สทฺธึ สํสนฺทนฺติ สเมนฺติ ฯ

[๓๙๖] ปาณาติปาตา ปฏิวิรตา … อทินฺนาทานา ปฏิวิรตา …
กาเมสุมิจฺฉาจารา ปฏิวิรตา … มุสาวาทา ปฏิวิรตา … ปิสุณาย
วาจาย ปฏิวิรตา ปิสุณาย วาจาย ปฏิวิรเตหิ สทฺธึ สํสนฺทนฺติ
สเมนฺติ ผรุสาย วาจาย ปฏิวิรตา ผรุสาย วาจาย ปฏิวิรเตหิ
สทฺธึ สํสนฺทนฺติ สเมนฺติ สมฺผปฺปลาปา ปฏิวิรตา สมฺผปฺปลาปา
ปฏิวิรเตหิ สทฺธึ สํสนฺทนฺติ สเมนฺตีติ ฯ จตุตฺถํ ฯ

[๓๙๗] สาวตฺถิยํ วิหรติ … ตตฺร โข ภควา … ธาตุโสว
ภิกฺขเว สตฺตา สํสนฺทนฺติ สเมนฺติ ปาณาติปาติโน ปาณาติปาตีหิ
สทฺธึ สํสนฺทนฺติ สเมนฺติ อทินฺนาทายิโน … กาเมสุมิจฺฉาจาริโน …
มุสาวาทิโน … ปิสุณวาจา … ผรุสวาจา … สมฺผปฺปลาปิโน
สมฺผปฺปลาปีหิ สทฺธึ สํสนฺทนฺติ สเมนฺติ อภิชฺฌาลุโน อภิชฺฌาลูหิ
สทฺธึ สํสนฺทนฺติ สเมนฺติ พฺยาปนฺนจิตฺตา พฺยาปนฺนจิตฺเตหิ สทฺธึ
สํสนฺทนฺติ สเมนฺติ มิจฺฉาทิฏฺฐิกา มิจฺฉาทิฏฺฐิเกหิ สทฺธึ สํสนฺทนฺติ
สเมนฺติ ฯ

[๓๙๘] ปาณาติปาตา ปฏิวิรตา ปาณาติปาตา ปฏิวิรเตหิ สทฺธึ
สํสนฺทนฺติ สเมนฺติ อทินฺนาทานา ปฏิวิรตา … กาเมสุมิจฺฉาจารา
ปฏิวิรตา … ปิสุณาย วาจาย … ผรุสาย วาจาย … สมฺผปฺปลาปา
ปฏิวิรตา สมฺผปฺปลาปา ปฏิวิรเตหิ สทฺธึ สํสนฺทนฺติ สเมนฺติ
อนภิชฺฌาลุโน อนภิชฺฌาลูหิ สทฺธึ สํสนฺทนฺติ สเมนฺติ อพฺยาปนฺนจิตฺตา
อพฺยาปนฺนจิตฺเตหิ สทฺธึ สํสนฺทนฺติ สเมนฺติ สมฺมาทิฏฺฐิกา
สมฺมาทิฏฺฐิเกหิ สทฺธึ สํสนฺทนฺติ สเมนฺตีติ ฯ ปญฺจมํ ฯ