ฉตฺตวคฺคสฺส ปฐมสิกฺขาปเท ฯ สกึปิ ธาเรติ อาปตฺติ
ปาจิตฺติยสฺสาติ มคฺคคมเน เอกปฺปโยเคเนว ทิวสํปิ ธาเรติ
เอกาว อาปตฺติ ฯ สเจ กทฺทมาทีนิ ปตฺวา อุปาหนา
โอมุญฺจิตฺวา ฉตฺตเมว ธาเรนฺตี คจฺฉติ ทุกฺกฏํ ฯ อถาปิ
คจฺฉาทีนิ ทิสฺวา ฉตฺตํ อปนาเมตฺวา อุปาหนารุฬฺหา ว
คจฺฉติ ทุกฺกฏเมว ฯ สเจ ฉตฺตํปิ อปนาเมตฺวา อุปาหนาปิ
โอมุญฺจิตฺวา ปุน ธาเรติ ปาจิตฺติยํ ฯ เอวํ ปโยคคณนาย
อาปตฺติโย เวทิตพฺพา ฯ เสสํ อุตฺตานเมว ฯ เอฬกสมุฏฺฐานํ
กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ
ติจิตฺตํ ติเวทนนฺติ ฯ
ปฐมสิกฺขาปทํ ฯ

ทุติเย ฯ ยาเนน ยายตีติ เอตฺถาปิ โอโรหิตฺวา ปุนปฺปุนํ
อภิรุหนฺติยา ปโยคคณนาย อาปตฺติโย ฯ เสสํ ปฐเม วุตฺต-
นยเมวาติ ฯ
ทุติยสิกฺขาปทํ ฯ

ตติเย ฯ วิปฺปกิริยึสูติ มาลาโย วิปฺปกิณฺณา ฯ อิธาปิ
โอมุญฺจิตฺวา ธาเรนฺติยา ปโยคคณนาย อาปตฺติโย ฯ
สมุฏฺฐานาทีนิ วุตฺตนยาเนว ฯ เกวลํ อิธ อกุสลจิตฺตํ โหตีติ ฯ
ตติยสิกฺขาปทํ ฯ

จตุตฺเถ ฯ สีสูปคาทีสุ ยํ ยํ ธาเรติ ตสฺส ตสฺส
วเสน วตฺถุคณนาย อาปตฺติโย เวทิตพฺพา ฯ เสสํ ตติเย
วุตฺตนยเมว ฯ
จตุตฺถสิกฺขาปทํ ฯ

ปญฺจเม ฯ คนฺธวณฺณเกนาติ คนฺเธน วณฺณเกน จ ฯ
เสสํ อุตฺตานเมว ฯ สมุฏฺฐานาทีนิ ตติยสทิสาเนวาติ ฯ
ปญฺจมสิกฺขาปทํ ฯ

ฉฏฺเฐ สพฺพํ ปญฺจเม วุตฺตสทิสเมวาติ ฯ
ฉฏฺฐสิกฺขาปทํ ฯ

สตฺตเม ฯ อุมฺมทฺทาเปติ อาปตฺติ ปาจิตฺติยสฺสาติ เอตฺถ
หตฺถํ อโมเจตฺวา อุมฺมชฺชเน เอกาว อาปตฺติ ฯ โมเจตฺวา
โมเจตฺวา อุมฺมชฺชเน ปโยคคณนาย อาปตฺติโย ฯ สมฺพาหเนปิ
เอเสว นโย ฯ คิลานายาติ อนฺตมโส มคฺคคมนปริสฺสเมนาปิ
สาพาธาย ฯ อาปทาสูติ โจรภยาทีหิ สรีรกมฺปนาทีสุ ฯ เสสํ
อุตฺตานเมว ฯ สมุฏฺฐานาทีนิ ตติยสทิสาเนวาติ ฯ
สตฺตมสิกฺขาปทํฯ

อฏฺฐมาทีสุ ตีสุ สิกฺขมานาย สามเณริยา คิหินิยาติ
อิทเมว นานากรณํ ฯ เสสํ สตฺตเม วุตฺตสทิสเมวาติ ฯ
ทสมสิกฺขาปทํ ฯ

เอกาทสเม ฯ ภิกฺขุสฺส ปุรโตติ อภิมุขเมวาติ อตฺโถ ฯ
อิทํ ปน อุปจารํ สนฺธาย กถิตนฺติ เวทิตพฺพํ ฯ
เสสํ อุตฺตานเมว ฯ กฐินสมุฏฺฐานํ กายวาจโต กายวาจาจิตฺตโต จ
สมุฏฺฐาติ กิริยากิริยํ โนสญฺญาวิโมกฺขํ อจิตฺตกํ ปณฺณตฺติวชฺชํ
กายกมฺมํ วจีกมฺมํ ติจิตฺตํ ติเวทนนฺติ ฯ
เอกาทสมสิกฺขาปทํ ฯ

ทฺวาทสเม ฯ อโนกาสกตนฺติ อสุกสฺมึ นาม ฐาเน
ปุจฺฉามีติ เอวํ อกตโอกาสํ ฯ เตเนวาห อโนกาสกตนฺติ
อนาปุจฺฉาติ ฯ อนุทฺทิสฺสาติ อสุกสฺมึ นาม ฐาเน ปุจฺฉามีติ
เอวํ อนิยเมตฺวา เกวลํ ปุจฺฉิตพฺพํ อตฺถิ ปุจฺฉามิ
อยฺยาติ เอวํ วตฺวา ฯ เสสํ อุตฺตานเมว ฯ ปทโสธมฺม-
สมุฏฺฐานํ วาจโต วาจาจิตฺตโต จ สมุฏฺฐาติ กิริยากิริยํ
โนสญฺญาวิโมกฺขํ อจิตฺตกํ ปณฺณตฺติวชฺชํ วจีกมฺมํ ติจิตฺตํ
ติเวทนนฺติ ฯ
ทฺวาทสมสิกฺขาปทํฯ