ทสเม ฯ วาเจยฺยาติ ปทํ วิเสโส ฯ เสสํ นวเม วุตฺตนเยเนว
เวทิตพฺพํ สทฺธึ สมุฏฺฐานาทีหีติ ฯ
ทสมสิกฺขาปทํ ฯ
จิตฺตาคารวคฺโค ปญฺจโม ฯ

อารามวคฺคสฺส ปฐมสิกฺขาปเท ฯ ปริกฺเขปํ อติกฺกมนฺติยา
อุปจารํ โอกฺกมนฺติยาติ เอตฺถ ปฐมปาเท ทุกฺกฏํ ทุติยปาเท
ปาจิตฺติยํ ฯ สีสานุโลกิกาติ ปฐมํ ปวิสนฺตีนํ ภิกฺขุนีนํ สีสํ
อนุโลเกนฺตี ปวิสติ อนาปตฺติ ฯ ยตฺถ ภิกฺขุนิโย ปฐมตรํ
ปวิสิตฺวา สชฺฌายเจติยวนฺทนาทีนิ กโรนฺติ ตตฺถ ตาสํ สนฺติกํ
คจฺฉามีติ คนฺตุํ วฏฺฏติ ฯ อาปทาสูติ เกนจิ อุปทฺทูตา โหติ
เอวรูปาสุ อาปทาสุ ปวิสิตุํ วฏฺฏติ ฯ เสสํ อุตฺตานเมว ฯ
ธุรนิกฺเขปสมุฏฺฐานํ กิริยากิรยํ สญฺญาวิโมกฺขํ สจิตฺตกํ
ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ
ปฐมสิกฺขาปทํ ฯ

ทุติเย ฯ อายสฺมา กปฺปิตโกติ อยํ ชฏิลสหสฺสสฺส
อพฺภนฺตโร เถโร ฯ สํหรีติ สงฺกาเมสิ ฯ สํหโฏติ สงฺกามิโต ฯ
กสาวโฏติ นหาปิโต ฯ กาสาวํ นิวาเสตฺวา กมฺมํ กโรนฺติ (๑)
ตํ สนฺธายาหํสุ ฯ เสสํ อุตฺตานเมว ฯ ติสมุฏฺฐานํ กิริยา
สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ
# ๑. กโรติ ฯ
อกุสลจิตฺตํ ทุกฺขเวทนนฺติ ฯ
ทุติยสิกฺขาปทํ ฯ

ตติเย ฯ อนุสาสนีปุเรกฺขารายาติ อิทานิปิ ตฺวํ พาลา
อพฺยตฺตาติอาทินา นเยน อนุสาสนีปกฺเข ฐตฺวา วทนฺติยา
อนาปตฺติ ฯ เสสํ อุตฺตานเมว ฯ สมุฏฺฐานาทีนิ อนนฺตร-
สิกฺขาปทสทิสาเนวาติ ฯ
ตติยสิกฺขาปทํ ฯ

จตุตฺเถ สพฺพํ อุตฺตานเมว ฯ จตุสฺสมุฏฺฐานํ กายโต
กายวาจโต กายจิตฺตโต กายวาจาจิตฺตโต จ สมุฏฺฐาติ
นิมนฺติตาย อนาปุจฺฉา ภุญฺชนฺติยา อาปตฺติสมฺภวโต สิยา
กิริยากิริยํ ปวาริตาย กปฺปิยํ กาเรตฺวาปิ อกาเรตฺวาปิ
ภุญฺชนฺติยา อาปตฺติสมฺภวโต สิยา กิริยา โนสญฺญาวิโมกฺขํ
อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ
จตุตฺถสิกฺขาปทํ ฯ

ปญฺจเม ฯ กุเล มจฺฉโร กุลมจฺฉโร ฯ กุลมจฺฉโร
เอติสฺสา อตฺถีติ กุลมจฺฉรินี ฯ กุลํ วา มจฺฉรายตีติ กุลมจฺฉรินี ฯ
กุลสฺส อวณฺณนฺติ ตํ กุลํ อสฺสทฺธํ อปฺปสนฺนนฺติ ฯ ภิกฺขุนีนํ
อวณฺณนฺติ ภิกฺขุนิโย ทุสฺสีลา ปาปธมฺมาติ ฯ สนฺตํเยว
อาทีนวนฺติ กุลสฺส วา ภิกฺขุนีนํ วา สนฺตํ อคุณํ ฯ เสสํ
อุตฺตานเมว ฯ ติสมุฏฺฐานํ กิริยา สญฺญาวิโมกฺขํ สจิตฺตกํ
โลกวชฺชํ กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ
ปญฺจมสิกฺขาปทํ ฯ

ฉฏฺเฐ ฯ โอวาทายาติ ครุธมฺมตฺถาย ฯ สํวาสายาติ
อุโปสถปฺปวารณาปุจฺฉนตฺถาย ฯ อยเมตฺถ สงฺเขโป ฯ วิตฺถาโร
ปน ภิกฺขุโนวาทกสิกฺขาปทวณฺณนายํ วุตฺโตเยว ฯ เอฬกโลม-
สมุฏฺฐานํ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ
กายกมฺมํ ติจิตฺตํ ติเวทนนฺติ ฯ
ฉฏฺฐสิกฺขาปทํ ฯ

สตฺตเม ฯ ปริเยสิตฺวา น ลภตีติ ภิกฺขุนึ น ลภติ ฯ เสสํ
อุตฺตานเมว ฯ อิมิสฺสาปิ วิตฺถาโร ภิกฺขุโนวาทเก วุตฺโตเยว ฯ
ธุรนิกฺเขปสมุฏฺฐานํ อกิริยา สญฺญาวิโมกฺขํ สจิตฺตกํ โลกวชฺชํ
กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ
สตฺตมสิกฺขาปทํ ฯ

อฏฺฐเม ฯ เอกกมฺมนฺติอาทีหิ อุโปสถปฺปวารณาเยว วุตฺตา ฯ
เสสํ อุตฺตานเมว ฯ อิมิสฺสาปิ วิตฺถาโร ภิกฺขุโนวาทเก
วุตฺโตเยว ฯ ปฐมปาราชิกสมุฏฺฐานํ อกิริยา สญฺญาวิโมกฺขํ
สจิตฺตกํ โลกวชฺชํ กายกมฺมํ อกุสลจิตฺตํ ทุกฺขเวทนนฺติ ฯ
อฏฺฐมสิกฺขาปทํ ฯ

นวเม สพฺพํ อุตฺตานเมว ฯ อิมิสฺสาปิ วิตฺถาโร ภิกฺขุโน-
วาทเก วุตฺโตเยว ฯ ธุรนิกฺเขปสมุฏฺฐานํ อกิริยา สญฺญาวิโมกฺขํ
สจิตฺตกํ โลกวชฺชํ กายกมมํ วจีกมฺมํ อกุสลจิตฺตํ ทุกฺขเวทนนฺติ ฯ
นวมสิกฺขาปทํ ฯ