อฏฺฐเม สพฺพํ อุตฺตานเมว ฯ ติสมุฏฺฐานํ กิริยา สญฺญา-
วิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ
ทุกฺขเวทนนฺติ ฯ
อฏฺฐมสิกฺขาปทํ ฯ

นวเม ฯ อภิสเปยฺยาติ สปถํ กเรยฺย ฯ นิรเยน อภิสปติ
นาม นิรเย นิพฺพตฺตามิ อวีจิมฺหิ นิพฺพตฺตามิ นิรเย นิพฺพตฺตตุ
อวีจิมฺหิ นิพฺพตฺตตูติ เอวมาทินา นเยน อกฺโกสติ ปริภาสติ ฯ
พฺรหฺมจริเยน อภิสปติ นาม คิหินี โหมิ โอทาตวตฺถา โหมิ
ปริพฺพาชิกา โหมิ อิตรา วา เอทิสา โหตูติ เอวมาทินา
นเยน อกฺโกสติ ฯ วาจาย วาจาย ปาจิตฺติยํ ฯ ฐเปตฺวา ปน
นิรยญฺจ พฺรหฺมจริยญฺจ สุนขี สูกรี กาณา กุณีติอาทินา
นเยน อกฺโกสนฺติยา วาจาย วาจาย ทุกฺกฏํ ฯ อตฺถ-
ปุเรกฺขารายาติ อฏฺฐกถํ กเถนฺติยา ฯ ธมฺมปุเรกฺขารายาติ ปาลึ
วาเจนฺติยา ฯ อนุสาสนีปุเรกฺขารายาติ อิทานิปิ ตฺวํ เอทิสา
สาธุ วิรมสฺสุ โน เจ วิรมสิ อทฺธา ปุน เอวรูปานิ กมฺมานิ
กตฺวา นิรเย อุปฺปชฺชิสฺสสิ ติรจฺฉานโยนิยํ อุปฺปชฺชิสฺสสีติ เอวํ
อนุสาสนิยํ ฐตฺวา วทนฺติยา อนาปตฺติ ฯ เสสํ อุตฺตานเมว ฯ
ติสมุฏฺฐานํ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ
วจีกมฺมํ อกุสลจิตฺตํ ทุกฺขเวทนนฺติ ฯ
นวมสิกฺขาปทํ ฯ

ทสเม สพฺพํ อุตฺตานเมว ฯ ธุรนิกฺเขปสมุฏฺฐานํ กาย-
วาจาจิตฺตโต สมุฏฺฐาติ กิริยา สญฺญาวิโมกฺขํ สจิตฺตกํ โลกวชฺชํ
กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ
ทสมสิกฺขาปทํ
อนฺธการวคฺโค ทุติโย ฯ

นคฺควคฺคสฺส ปฐมสิกฺขาปเท ฯ พฺรหฺมจริยํ จิณฺเณนาติ
พฺรหฺมจริเยน จิณฺเณน ฯ อถวา พฺรหฺมจริยสฺส จรเณนาติ
เอวํ กรณตฺเถ วา สามิอตฺเถ วา อุปโยควจนํ เวทิตพฺพํ ฯ
อจฺฉินฺนจีวริกายาติ อิทํ อุทกสาฏิกํ สนฺธาย วุตฺตํ น อญฺญํ
จีวรํ ฯ ตสฺมา อุทกสาฏิกาย อจฺฉินฺนาย วา นฏฺฐาย วา
นคฺคาย นหายนฺติยา อนาปตฺติ ฯ สเจปิ อุทกสาฏิกจีวรํ
มหคฺฆํ โหติ ฯ น สกฺกา นิวาเสตฺวา พหิ คนฺตุํ เอวํปิ
นคฺคา นหายิตุํ วฏฺฏติ ฯ เสสเมตฺถ อุตฺตานเมว ฯ เอฬกโลม-
สมุฏฺฐานํ กิริยา โนสญฺญาวิโมกฺขํ อจตฺตกํ ปณฺณตฺติวชฺชํ
กายกมฺมํ ติจิตฺตํ ติเวทนนฺติ ฯ
ปฐมสิกฺขาปทํ ฯ

ทุติเย สพฺพํ อุตฺตานเมว ฯ ฉสฺสมุฏฺฐานํ กิริยา
โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ
ติจิตฺตํ ติเวทนนฺติ ฯ
ทุติยสิกฺขาปทํ ฯ

ตติเย ฯ อนนฺตรายิกินีติ ทสสุ อนฺตราเยสุ เอเกนาปิ
อนฺตราเยน อนนฺตรายา ฯ ธุรํ นิกฺขิตฺตมตฺเตติ ธุรํ นิกฺขิปิตฺวา
สเจปิ ปจฺฉา สิพฺพติ อาปตฺติเยวาติ อตฺโถ ฯ เสสํ
อุตฺตานเมว ฯ ธุรนิกฺเขปสมุฏฺฐานํ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ
ตติยสิกฺขาปทํ ฯ

จตุตฺเถ ฯ ปญฺจ อหานิ ปญฺจาหํ ฯ ปญฺจาหเมว
ปญฺจาหิกํ ฯ สงฺฆาฏีนํ วาโร สงฺฆาฏิวาโร ฯ ปริโภควเสน
วา โอตาปนวเสน วา สงฺฆฏิตฏฺเฐน สงฺฆาฏีติ ลทฺธ-
นามานํ ปญฺจนฺนํ จีวรานํ ปริวตฺตนนฺติ อตฺโถ ฯ ตสฺมาเยว
ปทภาชเน ปญฺจมํ ทิวสํ ปญฺจ จีวรานีติอาทิมาห ฯ อาปตฺติ
ปาจิตฺติยสฺสาติ เอตฺถ จ เอกสฺมึ จีวเร เอกา อาปตฺติ ปญฺจสุ
ปญฺจ ฯ อาปทาสูติ มหคฺฆจีวรํ น สกฺกา โหติ โจรภยาทีสุ
ปริภุญฺชิตุํ เอวรูเป อุปทฺทเว อนาปตฺติ ฯ เสสํ อุตฺตานเมว ฯ
กฐินสมุฏฺฐานํ อกิริยา โนสญฺญาวิโมกฺขํ อจิตฺตกํ ปณฺณตฺติ-
วชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ
จตุตฺถสิกฺขาปทํ ฯ

ปญฺจเม ฯ จีวรสงฺกมนียนฺติ สงฺกเมตพฺพํ จีวรํ อญฺญิสฺสา
สนฺตกํ อนาปุจฺฉา คหิตํ ปุน ปฏิทาตพฺพํ จีวรนฺติ อตฺโถ ฯ
อาปทาสูติ สเจ อปารุตํ วา อนิวตฺถํ วา โจรา หรนฺติ
เอวรูปาสุ อาปทาสุ ธาเรนฺติยา อนาปตฺติ ฯ เสสํ อุตฺตานเมว ฯ
กฐินสมุฏฺฐานํ กิริยากิริยํ โนสญฺญาวิโมกฺขํ อจิตฺตกํ ปณฺณตฺติ-
วชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ
ปญฺจมสิกฺขาปทํ ฯ

ฉฏฺเฐ ฯ อญฺญํ ปริกฺขารนฺติ ยงฺกิญฺจิ ถาลกาทีนํ วา
สปฺปิเตลาทีนํ วา อญฺญตรํ ฯ อานิสํสนฺติ กิตฺตกํ อคฺฆนกํ
ทาตุกามตฺถาติ ปุจฺฉติ เอตฺตกํ นามาติ วทนฺติ ฯ อาคเมถ
ตาว อิทานิ วตฺถํ มหคฺฆํ กติปาเหน กปฺปาเส อาคเต
สมคฺฆํ ภวิสฺสตีติ เอวํ วตฺวา นิวาเรนฺติยา อนาปตฺติ ฯ เสสํ
อุตฺตานเมว ฯ ติสมุฏฺฐานํ กิริยา สญฺญาวิโมกฺขํ สจิตฺตกํ
โลกวชฺชํ กายกมฺมํ วจีกมฺมํ อกุสลจิตฺตํ ติเวทนนฺติ ฯ
ฉฏฺฐสิกฺขาปทํ ฯ

สตฺตเม ฯ วิปฺปกฺกมึสูติ อญฺญาสํปิ อาคมนํ อาคเมนฺติ
อทฺธา อมฺหากํปิ อาคเมสฺสนฺตีติ ตตฺถ อคมํสุ ฯ ปฏิพาเหยฺยาติ
ปฏิเสเธยฺย ฯ อานิสํสนฺติ เอกิสฺสา เอกสาฏกํ นปฺปโหติ
อาคเมถ ตาว กติปาเหน อุปฺปชฺชิสฺสติ ตโต ภาเชสฺสามีติ (๑)
เอวํ อานิสํสํ ทสฺเสตฺวา ปฏิพาหนฺติยา อนาปตฺติ ฯ เสสํ
อุตฺตานเมว ฯ ติสมุฏฺฐานํ กิริยา สญฺญาวิโมกฺขํ สจิตฺตกํ
ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ
สตฺตมสิกฺขาปทํ ฯ